MZU Auditorium CM Hawla'n a hawng

Mizoram University-a auditorium sak thar chu nimin khan Chief minister Lal Thanhawla'n a hawng.

Chief Minister chuan, MZU campus-ah Skill Development Centre din tum a nih thu sawiin, "Zirlaite thiamna leh theihna chher chhuah kawnga nasa taka a puih theih ngei besei a ni," a ti.

Auditorium hawnna inkhawm hi MZU registrar Zothankhuma'n a kaihruai a; CM Lal Thanhawla chuan auditorium chu University Grants Commission puihnaa sak a nih thu sawiin, "Khawvela technology lam intlansiaknaa tel pha tura zirna in sang tihchangtlun zel hi kan tum ber pakhat a ni," a ti a; MZU thuneitute, zirlaite leh mi dangte chu auditorium uluk tak leh fai taka enkawl reng turin a chah.

Lal Thanhawla chuan, "MZU hi Central University a nih angin, Mizote'n kawng tam takah kan ṭangkaipui hle. Kum eng emaw zah kal ta chhunga hmasawnna namênlo hmuh theiha a awm hi a thawktute'n zirlaite hmakhua an ngaih pawimawhzia a tilang a ni," a ti.

MZU vice chancellor Prof. R Lalthantluanga sawi danin, MZU auditorium hi mipui tan pawh hman theih a ni dawn a, hman man erawh siam a ni ang.

MZU auditorium hi 11th Plan Fund hnuaia sum hmuh cheng nuai 1170 hmanga sak a ni a, October 10, 2011-ah sa ṭanin, March 30, 2015-ah sak zawh a ni.

Auditorium bakah, a hmunhma chei nannate nen cheng nuai 1316 sen a ni a; a zau zawng chu sq.metre 1,742 niin, mi 864 ṭhut theihna seat dah a ni.