Aizawl dist. Consumer Forum-in Thubuai 3,675 chingfel tawh

Consumer Disputes Redressal District Forum (Consumer Forum), Aizawl district chuan a din tirh aṭanga April 30, 2015 thleng khan thubuai 3,709 an dawng tawh a, chung zinga 3,675 chu an chingfel tawh.

Aizawl district Consumer Forum-in an tarlan danin, April 2015 thlenga thubuai an chinfel tawh zat, 3,675 hi thubuai an ziah luh 3,709 aṭangin 99.08% a ni a; case 1,179 (32.08%) chu danin thubuai chinfel hun tur a bituk chhungin chinfel a ni.

Hetih lai hian, thubuai 434 chu Consumer Forum-in amaha chingfel loin, Lok Adalat hmanga chinfel a ni a; April 30, 2015 thleng hian thubuai la chinfel loh 34 a awm bawk.

Aizawl district Consumer Forum hotute chuan, thubuai an ziah luhte chu ṭhenkhat chinfel mai theih loh a awm laiin, ṭhenkhat chu rei lo te chungin an chingfel mai ṭhin tih an sawi a, "Thubuai chinfel hma chungchangah hearing-a an inlan ṭhat leh ṭhat lohin awmzia a nei hle," an ti.

Record-a a lan dan­in, thubuai ṭhenkhat chu ni 10-20 inkara an chinfel laiin, ṭhenkhatte erawh chu ni 100 chuang hnuahte an chingfel thei chauh a ni.