BJP-in member lâk beihpui thlâk dawn

BJP Mizoram Pradesh hruaitute chuan, BJP chu khawvela political party lian ber leh member ngah ber niin an sawi a, India ram hmun hrang hrangah member lâk rûnpui an nei mek a, Mizoramah pawh member lâk beihpui an thlâk dawn tih an puang.

Mizoram BJP hruaitute chuan nimin khan Aizawl Press Club-ah thuthar thehdarhtute an kâwm a; an president Lalhluna chuan, BJP chuan India ramah member mi vaibelchhe 10 chuang an nei nia sawiin, "Mizoramah pawh kan ṭhangduang hle a, Mizorama BJP mi leh sa VC-a thlan tlin mi 80-te hamṭhatna ngaihtuahpui turin general secretary Sushree Saroj Pandey chu May 15-ah Aizawlah a rawn kal dawn a ni," a ti.

Lalhluna chuan, BJP-in Mizoramah member lak beihpui thlakna, Mega Contact Campaign an nei dawn tih sawiin, chumi atana mawhphurtu turte pawh an inruat tawh tih a sawi a; VC inthlan zawh takah VC member 80 neiin, khaw 14-ah hnehna an chang tih a sawi.

Lalhluna chuan, BJP chu sakhaw zalennaah a innghat nia sawiin, India ramna sakhua zawng zawngte chu angkhatin an en niin a sawi a, "Biak-in suasam chungchangah, BJP mi leh sa ni loin, misual rûkrû leh BJP tihhmingchhiat duh vanga political party dangte hmalakna a ni," a ti.

Bawng talh khap leh khap loh chu state sorkar thuneihna a nih avangin, Mizoramah bawng talh khap a hlauhawm loh niin a sawi a, "BJP sorkar hnuaia bawng sa ei thei lo tura insawiṭhaih ṭhin hi thu dik lo a ni," a ti bawk.