Police kut phuar a ni lo: Congress party

Congress party chuan thuchhuah siamin, Mizoram sorkarah police-te kut phuar a ni lo tih an tarlang a; HPC(D) chungchangah, "Mizoram rálmuanna tichhe zawnga an chêt reng avangin sorkar chuan thapui a chhuah lo thei ta lo a ni," an ti.

MPCC chuan, HPC(D)-te'n Mizoramah harsatna hrang hrang - tukluih chhiah khawn, inthlan dawna mi rîkrâpa harsatna an siam ṭhin tih an sawi a, "HPC(D)-te thil tihah hian Congress sorkar chuan dan anga an chunga action lâk a nih theih nan chak takin hma a la a, MLA-te lambunnaa phusa ber HC Malsawmkima chu Mizoram police-te'n man an tumna lamah ama'n silai a hmeh puah hmasak avangin kah hlum a ni ta a ni," an ti.

HPC(D) helte beih let kawnga police chêt dan chuan Congress sorkarah police-te kut phuar a nih lohzia a lang chiang a, Home minister R Lalzirliana enkawlna hnuaiah police-te'n chak tak leh huaisen takin hna an thawk thei niin an sawi.

MPCC tarlan danin, MPCC chuan Mizoramah remna leh muanna awm se an duh ber a, HPC(D)-te nen pawh dawhkan kîla inremna zawn reng a ni a, mahse HPC(D) lamah harsatna a awm avangin inbiakna chhunzawm theih a ni lo.

Congress party chuan, MNF-in sorkarna a chan lai, kum 1998-2008 chhung­in hel kutah police (force mi) 19 leh civil mi 17-in nunna an chán niin an sawi a, "MNF-in kum 10 an sorkar chhung khan hel an beih letna sawi tur a awm lo a, police-te kut chu phuar beh tlat a ni a, hel training-na hmun atan an hmang hial zawk a ni," an ti.