Oil palm mithiamte’n Agriculture minister an kâwm

Mizorama oil palm dinhmun zir tur leh enfiah tura rawn kal Solvent Extraction Association member mi parukte chuan nimin khan Agriculture minister R Lalzirliana a pisaah an kâwm.

Inkawmnaah hian Mizoramah hlawhtling zawka oil palm chîn a nih theih nan kawngpui laih a ṭul thu te, ṭhál laia tui pek dan tur te, halfmoon terrace laihte leh leiṭha pek a ṭul thute an sawiho a ni.

Solvent Extraction Association member-te hi Ministry of Agriculture-a additional commissioner Anupam Barik-a’n a ho a, Agriculture Minister an inkawmhonaah hian parliamentary secretary Lt.Col. ZS Zuala, Agriculture secretary Lalhming­thanga leh director pahnih Dr C Lalzarliana leh Lalrinliana te an tel.

Solvent Extraction Association member-te hian May 11 khan Mizoram rawn thlengin, West Serzawla Oil Palm Seed Garden an tlawh nghal a; Thawhṭanni khan Khamranga oil palm chînna, Bukvanneia Oil Palm Mill leh Thingdawl Agriculture Farm-a Oil Palm Demonstration tihna hmunte an en leh a ni.