Thlai hralhnaah harsatna a awm loh nan sum kan inring reng tawh - Chief Minister

Mizoram Agricultural Marketing Board chuan nimin khan IPR Auditorium-ah 'Bána Kaih Sensitization cum Consultation Meeting on Thlai Thar Market' an buatsaih a; thusawitu chief minister Lalduhoma chuan, thlai hralhah harsatna a awm loh nan sum an inring reng tawh tih a sawi.

Chief Minister chuan, nikum tun ang huna an policy zawrh chu tunah chuan an kutah a awm tawh thu sawiin, "Tihlawhtling turin theihtawp chhuahin kan thawk thei ta. Thlai tharte ṭha taka hralh turin kawng ṭha a pawimawh a, thlai thar huna kawng ṭha nei hman turin rilru zawng zawng nen theihtawp kan chhuah," a ti.

Thlai hralhtute'n harsatna an tawh lohna turin support price tur sum an inring reng tawh tih sawiin Lalduhoma chuan, "Thlai thar leitute'n min dawn hniam (bargain) lohna turin ruahmanna siam a ni," a ti a; Mizoram leh Tripura ramria Langkaih lei dawh zawh hunah thawven khat a awm tur thu a sawi.

CM Lalduhoma chuan, Bana Kaih scheme a hlawhtlin nan DC-te an pawimawh thu sawiin, "Bána Kaih scheme ṭha taka kalpui a nih theihna atan DC zawng zawng training pek an ni tawh. CM Special Package dil an ṭhahnem hle a, DC-te hnenah an thehlut mek a, endik nghal zel a ni," a ti.

Sorkar hnathawk ruih theih thila buai an awm tih sawiin Chief Minister chuan, "Hnathawk zingah hna thawk thei lo khawpa ruih theih thila buai an awm a, thawk thei lo na nâ nâ chu chawlhtir zel a ngai dawn," a ti a, inhlahthlem a rem loh tur thu a sawi.

Sawihona hunah Agriculture & Farmer Welfare minister PC Vanlalruata'n thuhma a sawi a; adviser to CM (handholding) Dr KC Lalmalsawmzauva'n thlai hralh kalpui dan tur an ruahmante a sawifiah hnuah sawihona hun hman a ni.

Bána Kaih scheme inhrilhfiahna leh inrawnkhawmnaah minister leh MLA eng emaw zat an tel a; eptu MLA-te chu sàwm ni mah se, tel an awm lo thung.

Mizoram sorkar chuan Standard Operating Procedure for Societies in the Sale of Notified Crops notification te, District Agricultural Marketing Committee (DAMC) dinna notification-te leh Secondary Collection Centre SOP notification te October 28, 2024 khan a tichhuak a, district committee-te nena zirhona neih tawh a ni. DAMC hian an district-a khaw tinah inhrilhfiahna an kalpui ve leh bawk.