SHC inthlanpuiah MNF an chak

November 5, 2024-a Sinlung Hills Council inthlanpuiah MNF party an chak ber a, an thawhpuite nen sorkar an siam thei dawn.

SEC inthlanah hian bial awm zawng zawng 12 zinga panga chu MNF-in an la a, ZPM-in bial pathum leh Congress party-in bial pakhat an la. Independent candidate zinga mi pahnih an tling a, BJP leh HPC candidate-te an tling zo lo thung. Hetih lai hian, New Vervek bial result erawh nimin tlai dar 5 thleng khan hriat theih a la ni lo.

Inthlanah hian ZPM leh HPC party-te an thawk dun a, MNF leh HPC(R) an thawk dun bawk. Thu dawn danin, independent-a tlingte hi HPC(R) hminga ding an ni a, Election Commission of India-a inziak lut lo an nih avangin independent anga ding an ni. Anmahni hi MNF party mi leh sa, MNF block-a treasurer leh secretary an ni a, HPC(R) aiawhin an ding niin MNF hruaitute chuan an sawi.

New Vervek bial vote chhiar chungchanga Vanglaini zawhna chhanga state election commissioner Dr H Lalthlangliana sawi danin, vote chhiar chungchangah hian MNF party leh VC-te'n complaint an thehlut a, chuvang chuan SEC hotute leh observer-te'n an buaipui zui a ni.

Nimin tlai dar 4 khan Aizawl DC pisa hall-ah vote chhiar ṭan leh niin, vote chhiartute thlak vek a ni a; he thu buatsaih lai hian result hriat hman a ni lo.

State Election Commission (SEC) tarlan danin, SHC inthlanpui vawi hnihnaah hian voter 23,789 zinga 17,055-in vote thlakin, vote tla percentage 71.69 a ni a; vote thlaktute chu mipa 8,730 leh hmeichhia 8,325 an ni.