Doctor kutthlak rawn chhuiah Home-in thutlukna la siam lo

September 21, 2024 (Inrinni) zana Durtlang Leitana doctor pahnih leh mi dang pakhat kutthlak rawn chungchang chhuitu Magisterial Inquiry report-ah Home department-in thutlukna an la siam lo.

Vanglaini palai zawhna chhangin Home department hotute chuan, Home department hotute Aizawlah an awm kim hleih theih loh avangin Magisterial Inquiry report an enho hma theih loh thu an sawi a, "Ṭum khat chu enho a ni tawh a, thutlukna siam a la ni lo. Ṭum khat ennawn leh a nih chuan thutlukna a siam theih tawh mai thei, uluk taka ngaihtuah a ni," an ti.

Tarlan tawh angin, kut inthlak rawn chungchang chhui tur hian Mizoram sorkar chuan September 30, 2024 khan Magisterial Inqury a din a ni.

Magisterial Inquiry ti tura ruat Aizawl additional district magistrate Mark Lalthanliana chuan October 7 khan Aizawl District Magistrate hnenah report a thehlut a; District Magistrate chuan October 9 khan Home department-ah a thehlut veleh a ni.