Khualzin hîp dan tur ruahmanna siam intihsiakah Serchhip district ṭha ber

Tourism department chuan November 5, Thawhlehni zan khan Ignite Studio, Aizawlah khualzin hîp dan tur ruahmanna siam intihsiakna, District Wise Tour Itinerary Creation Competition an buatsaih a, Serchhip district pakhatna an ni.

Inelnaah hian district hrang hrang DC office aiawhte'n an district chhunga khualzin hìp theihna tur ṭha nia an hriatte leh ruahmanna an neihte an tarlang a; Serchhip DC office chu pakhatna niin Rs 30,000 an dawng. Pahnihna Saitual DC office-in Rs 20,000 leh pathumna Lunglei DC office-in Rs 10,000 an dawng a; district tin hnenah certificate hlan a ni bawk.

Intihsiakna hi minister of state Prof. Lalnilawma'n a hmanpui a; DC-te'n phûr taka tourism lam hmasawnna tura an district-a tourist destination-te an pho chhuak chu hmasawnna a nih thu sawiin, "Mizoramin khualzinte hìp theihna kan nei ṭha a, kan la hai chhuah tur pawh tam tak a la awm ang. He inelna hian khualzinte hîpna turah hmasawnna a thlen ngei dawn a ni," a ti a, ṭanrual a pawimawh thu a sawi.

Tour Itinerary Creation Com­pe­tition-ah hian Vanneihtluanga, Maria CT Zuali leh J Vanlalliana te endiktu an ni a; Tourism director R Lalrodingi'n thu a sawi bawk.