Mizoram Governor leh Chief Minister-in ICFAI University Convocation an hmanpui

Institute of Chartered Financial Analysts of India (ICFAI) University, Mizoram chuan nimin khan NJ Yasaswy Memorial Auditorium-ah convocation vawi 12-na an hmang a; Governor Dr Hari Babu Kambhampati, ICFAI University visitor ni bawk leh chief minister Lalduhoma ten an hmanpui.

Governor chuan, zirna chu hmasawnna rahbi hrang hrangte innghahna lungthu pawimawh a nih thu sawiin, "Ngaihtuahna fim leh dik min puttir a, mawihnai taka chêt leh khawtlang tana awmze nei zawka hmalak kawngah min pui ṭhin," a ti a; degree dawng tharte chu finna leh thiamna nen ṭha taka khawvel hmachhawn thei tura ngaih an nih thu a sawi.

Zirlaite chu rinawmna leh taimakna nunpui a, mi dang tana malsawmna ni tura chahin Larsap chuan, "In kalna apiangah a ṭha zawnga danglamna thlen tum ang che u. Prime Minister-in kum 2047-ah India ram hmasawn 'Viskshit Bharat' din a tum chu 'Vikshit Mizoram' tel loin a tihpuitlin theih loh. Zirlaite'n Vikshit Bharat dinhmun ni thei turin sorkar laipui scheme-te in ngaihvena in hman ṭangkai a ṭul," a ti.

CM Lalduhoma chuan, "Convocation hi in thawhrimna rah chhuah a taka hmuhna hun a nih mai bakah, bul ṭanna thar a ni," a ti a; khawvel ṭhang zelin a ken tel chonate chu thil thar leh ṭha zawk ngaihtuah chhuah nan hman tum turin zirlaite a chah.

Zirlai graduate tharte chu ram leh hnam innghahna la ni turte an nih thu sawiin Lalduhoma chuan, "Chona thar hmachhawn ngam tur leh eizawnna mai bakah, thil dangahte pawh danglamna thlentu nih tum ang che u," a ti a; Mizoram zirna sang zawka seat indaih lohna phuhru tura ICFAI University hmalaknate lawmawm a tih thu a sawi.

Khualzahawm Dr Ravi Kannan, Cachar Cancer Hospital & Research Centre director pawhin thu a sawi a; mi dang tana rawngbawlna ngai pawimawh tur leh danglamna thlentu nih tum turin zirlaite a fuih.

Convocation-ah hian zirlai 207 hnenah degree hlan a ni a, chung zinga 192 chu post graduate (PG) niin, under graduate (UG) 15 an awm. Medalist 27 - gold medalist 13 leh silver medalist 14 hnenah Governor leh Chief Minister-te'n medal an hlan a ni.

India hmarchhak mi cancer natna veite enkawla thawh hlawk avangin Cachar Cancer Hospital & Research Centre Director hnenah ICFAI University, Mizoram chuan Degree of Doctor of Science (D.Sc. Honoris Causa) an hlan bawk.

ICFAI University, Mizoram hi ICFAI Group hnuaiah kum 2006 khan din a ni a, zirlai 548, zirtirtu 69 (a nghet 32 & a nghet lo 37) leh administrative staff 15 an awm mek. PG-ah course 11 leh UG-ah course pariat a awm a ni.