SHC-ah lawmthu sawi theia kan awm hi Pathian remruat a ni - Zoramthanga

MNF president Zoramthanga chuan, Sinlung Hills Council inthlanpuiah bûkin an awm a, lawmthu sawi theia an awm chu Pathian remruat a nih thu a sawi.

MNF party chuan SHC inthlanpui vawi hnihna neih zawh takah sorkarna siam theia an chak avangin nimin khan Mizo Hnam Rûnah lawmthu sawina inkhawm an hmang a; Zoramthanga chuan, "Bûkin kan awm a, HPC(R) nen kan thawhhonaah lawmthu sawi theia kan awm hi a lawmawm hle," a ti.

Zoramthanga chuan, "MNF an tla, an tih hian tlak chhan kan sawi ṭhin a, chumi, khami vang chu a ni, NDA-a kan tel vang a ni tihte an sawi ṭhin. Vawi hnih khat inthlan hi Pathian ngaih pawimawh ber a ni lo; a changin min dah sang a, a changin min dah hniam ṭhin a ni zawk," a ti a; MNF chu Pathian puihna vanga ding chhuak a, kum 63-naah pawh party lian tak la ni an nih thu a sawi.

Party dangte chu an ral zel nia sawiin MNF President chuan, "Tuna ZPM sorkar hmang hian Pathianin engtin nge MNF hi min humhalh a tum? Kum 60 chuang min hruaitu hian kawng lakah min kalsan lo ang. A remruatna angin kan kal a, a thiltum tihlawhtling turin min hum zel ang. 'Pathian leh kan ram tan' tih hi i zir zel ang u," a ti.

Report petu MNF vice president Lalchhandama Ralte chuan, a bial Tuivawl constituency chhunga SHC bial paruk awmah MNF-in bial panga an lak thu leh, bial pakhat - New Vervek erawh chu thil felfai lo deuh a awm avangin State Election Commission kutah a la awm thu a sawi.

MNF treasurer Lalruatkima pawhin Chalfilh bial report a pe a; Chalfilh constituency-ah SHC bial pali a awm thu sawiin, "SHC bial pahnih lain, bial pahnih hloh mah ila, Chalfilh bial pumah hian MNF kan hlawm ṭha em em a ni," a ti.

Serlui bialtu MLA Lalrinsanga Ralte, MNF general secretary chuan, Serlui biala SHC bial pahnih zinga pakhat an la a, bial pakhat an hloh thu a sawi a; ZPM sorkar chu kum khat chhungin hmar bial mipuiin an hnê tawh hle niin a sawi bawk.