SHC-ah hmasawnna nasa tak kan nei - Lal Thanzara

Mizoram Pradesh Congress Committee (MPCC) president Lal Thanzara chuan thu-chhuah siamin, Sinlung Hills Council inthlanpuiah an beisei ang result nei pha lo mah se, Congress party-in hmasawnna nasa tak an nei a, lawmawm a tih thu a tarlang.

Lal Thanzara chuan, SHC bial 12 zinga pariat chu MNF MLA bial leh bial pali chu ZPM MLA bial a nih thu leh, ZPM leh HPC an thawk dun a, MNF leh HPC(R) an thawkho bawk thu a sawi a, "Thawhpui nei loa Congress kan mal din chunga bial hrang hranga Congress candidate-te vote hmuh 2023 MLA Election aia hmasawnna nasa tak lo lang hi a lawmawm. SHC-ah hian seat pakhat chauh la mah ila, kan vote share a hniam lo a, bial thumah pahnihna kan nih bakah vote tlemtêin kan tla a, hma kan sawnzia a tarlang," a ti.

MPCC President chuan, Khawlian bialah Congress candidate Lalrawngbawla thlan tlin a ni tih sawiin, bial mipui chungah lawmthu a sawi a; eptu bial ni dawn mah se, an thlahthlam dawn tih hre turin bial mipui a chah.

Lal Thanzara chuan, an party candidate-te leh an tana theihtawp chhuahtute leh inthlan buaipuitu zawng zawng chungah a lawm thu a tarlang a; SHC-a MNF sorkar thar ding a lawmpui a, duhsakna a hlan tih a tarlang bawk.