Curfew leh lirthei tlan phal loh Bawhchhia Aizawlah an tam
Aizawla local task force (LTF) ṭhenkhat hruaitute chuan, sorkarin curfew a puan hun chhung, zan dar 8 hnu lamah leh Pathiannia lirthei tlân phal lohah dan bawhchhiaa tlan chhuak an tam thu an sawi hlawm. LTF hruaitute hi Vanglaini palaiin nimin khan a be kual a ni.
Durtlang LTF hruaitute chuan, veng hrang hrang aṭangin Pathianniah an vénga kal tum an tam thu sawiin, "Sorkarin chhuah a phalsak ni lêm lo rawn veivâk an tam hle. Engtin nge kan veng an rawn thlen theih kan hre bik lo," an ti.
Niminah pawh hmun pakhat chauha duty an tum laiin, lirthei veivâk a tam avangin hmun pathumah an duty thu sawiin Durtlang LTF hruaitute chuan, "Rawn lênvah tum tam tak chu kan hawtir leh a ni," an ti a; sorkarin curfew a puang rau rau a nih chuan bawhzui ṭha deuh se an duh thu an sawi.
Salem Veng LTF hruaitute chuan, curfew puan chuan awmzia a nei viaua an hriat thu sawiin, "Curfew lai leh curfew loh lai chu lirthei veivâk a intam hleih hle. Chutih rual chuan, curfew bawhchhia an awm reng a, chu'ng mite chu kan man lo a, kan hawtir ṭhin," an ti.
A khát tâwkin an duty reng thu sawiin Salem Veng LTF hruaitute chuan, "Kan huam chhungah kan kal kual ṭhin a, a sâwt hle," an ti a; an duty khât deuh erawh chuan curfew dan bawhchhia an pun vat ṭhin thu an sawi.
Aizawl khawpuia main road ni lo, veng hrang hrang LTF hruaitute Vanglaini palaiin a biakte chuan an huam chhungah sorkarin duty a dah loh avangin curfew-in awmzia a neih tam lutuk loh thu an sawi hlawm.
Mizoram sorkar chuan veng hrang hrangah Covid-19 chungchanga dan leh thupekte kengkawh a, dan bawhchhiate man thei turin sorkar hnathawk, Covid-19 Executive Duty tia vuahte a dah ṭhin a, chu'ng mite chu zan dar 8 hnu lam leh Pathianniah an duty lo thung.
Hetih lai hian, main road leh hmun ṭhenkhatah chuan curfew lai leh Pathianniah police duty tir an ni.