Hunpui vuakvêtah lirthei endik dawn

Traffic SP Stephen Lalrinawma chuan, hunpui vuakvêtah harsatna lian tham a thlen loh nan lirthei endikna, Special Drive kalpui a nih dawn thu a sawi a; kawngpui kânna zebra crossing rapa ding lo turin lirthei khalhtute a chah.

Stephen Lalrinawma chuan, footpath leh zebra crossing-te chu mipui kea kalte himna atana hman ṭangkai tur a nih thu a sawi a, "Dan zawm hi khua leh tui ṭha ni tura kan tih tur pawimawh a ni a, lirthei khalhtute'n zebra crossing rapin lirthei kan tiding tur a ni lo," a ti.

Hunpui vuakvetah lirthei chetsualna a thlen loh nan Special Drive kalpui a nih dawn thu sawiin Traffic SP chuan, "Lirthei neitute'n kan lirthei document-te felfai taka enkawl tur a ni," a ti a; lirthei chetsual chhan tam ber chu fimkhur loh vang a nih thu a sawi.

Aizawl Traffic SP chuan, phal chin bâk pêla ri bengchheng tichhuak silencer/exhaust hmang lirtheite chungah dan ang taka hmalak a nih dawn thu a sawi a; rîkrum thil leh harsatna thleng palh thei a nih avangin Traffic SP chuan lirthei khalhtute chu lirthei an kalsan dawnin lirtheiah biakpawh theihna tur phone number dah ṭhin turin a chah.

Traffic Police hotute chuan, lirthei dan bawhchhia an man tam ber chu phal lohna hmuna lirthei dah te, khawpui chhunga one way leh entry period zâwm lo te, tlân phal loh zawnga tlân leh kual phal lohna hmuna kualte an nih tlangpui thu Vanglaini an hrilh a, "Lirthei tlân tluang tikhaihlak khawpa lirthei khalh leh dah ang chi te, mahni duh dana lirthei number lo ziah ve ngawt te, tê lutuk leh a bikin bike mei (tail) hnuaia number vuahna siam leh têreuhtê an vuahte kan man tam zual," an ti bawk.