ZPM-in lawmthu an sawi

ZPM party chuan thuchhuah siamin, Sinlung Hills Council inthlanpui neih zawh takah ZPM leh HPC party-te thawk dun vote-tute chungah an lawm thu an tarlang a; inthlana chakte SHC tan ṭhahnemngai taka thawk turin duhsakna an hlân.

ZPM chuan, an chakna bial leh an chak lohna biala ZPM leh HPC candidate-te vote-tu mipui chungah lawmthu an sawi a, "Hmar tlangdung hmasawnna turin ZPM leh ministry chuan theihtawp a chhuah zel dawn. Tun dinhmunah SHC bial zawng zawngah politics harhtharna la thleng rih lo mah se, a tahtawl leh hmatiam zela kalphung thar mipui sorkar a din zel kan beisei a, ZPM hian ṭhahnemngai takin hmar tlangdung mipui tan hma a la zel dawn a ni," an ti.

Inthlan campaign chhung zawnga hruaitu Pathian chungah an lawm thu an tarlang a; ZPM leh an candidate-te tana theihtawp chhuahtu te, inthlan buaipuitu te, venhimna hna thawktute leh MPF-te thawh­rimnaah an lawm thu an tarlang bawk.