Governor-in LZa lawmpuina a hlân

Governor Dr Hari Babu Kambhampati chuan November 5, Thawhlehni zan 7 khan boruak thianghlim leh hrisel neih pawimawhna thupuia neia thirsakawr hmanga India ram tlawh chhuaktu Vanlallawmzuala Varte, Mission Veng chu Raj Bhavan-ah a lo hmuak a, lawmpuina momento leh Rs 10,000 a hlan.

Dr Hari Babu Kambhampati chuan, Vanlallawmzuala Varte-in thuchah pawimawh tak kenga thirsakawra inkhalha India ram state 28 leh UT panga a tlawh chhuah chu ropui a tih thu leh a inpekna leh taimakna chhuanawm a tih thu a sawi a; dam leh hrisel taka Mizorama a lo let leh chu a lawmpui thu a sawi.

Governor chuan, sik leh sa chak taka a inthlak danglam zel chu veiawm a tih thu sawiin, "Inzirtirna zau zawka kalpui a ṭul tak zet a, boruak thianghlim neih pawimawhna inzirtirna campaign hmanga thuchah leh zirtirna a kente hian rah ṭha a chhuah ngei ka beisei," a ti.

Inlawmpuina inkhawm tawiah hian Vanlallawmzuala Varte pawhin All India Tour a neih chungchang te, a thang chhunga a thil tawnte leh harsatna a paltlangte Larsap a hrilh a; Mizoram aṭanga Delhi thleng a kalna china thlalak leh chanchin tawi ziahna lehkhabu a hlan a ni.