NCST member-in Mamit a tlawh

National Commission for Scheduled Tribe (NCST) member Nirupam Chakma chuan nimin khan Mamit a tlawh a, IPR conference hall-ah Mamit district-a hnam hnuaihnung leh tlem zawkte (minority) a kawm bakah, DC conference hall-ah sorkar official-te a kâwm.

Minority-te nen an inkawmnaah Nirupam Chakma chuan, India ramah scheduled tribe mi vaibelchhe 10 chuang an awm mek thu sawiin, "In dinhmun leh harsatnate hriatsaka hmuhsak tur cheua rawn kal ka ni a, tuna harsatna leh mamawh in neih in thlente hi sorkar hotute nen kan sawiho dawn," a ti a; zawhnate awmte a chhang a ni.

Nirupam Chakma chuan, Mamit district-a sorkar official-te a kawmnaah, sorkar official-te chu mipui tana thawk an nih ang taka theihtawp chhuah turin a chah a, "District-in hmasawnna ṭha zawk a hmuh theih nan kan zavaia ṭanrual a pawimawh," a ti.

Mamit bawrhsap Jacob Lalawmpuia tarlan danin, Mamit district-ah hian mi 1,01,290 an cheng a, chenna in (household) 20,902 awmin, khua (village) 89 leh sub-villages pakua a awm. Sex ratio chu 927 (mipa 1,000-ah hmeichhia 927) niin, literacy rate hi 84.74% a ni a, sorkar department hrang hrang 47 a awm bawk.

National Commission for Scheduled Tribe hi India Constitution Article 338A hnuaiah constitutional body a ni a, February 19, 2004 khan din a ni.