KHAWTHLIR

In kâng ral

November 5, Thawhlehni zan dar 6:30 vel khan Champhai Electric Venga Lalhmunliani in a kàng a, thi leh hliam awm lo mah se, Rs 1,91,950 leh bungrua Rs 9,42,000 hû a kâng ral. In kângah hian vawk pahnih leh ar 23 an kâng hlum tel a ni. Champhai Fire Station chuan, in kan chhan chu ṭêk tla vang nia rin a nih thu an tarlang.

Mei zu man

Lunglei District Anti Tobacco Squad chuan nimin khan Lunglei khawpuia sorkar pisa hrang hrangah mei zu an awm leh awm loh an endik a, phal lohna hmuna mei zu mi pakhat manin, pawisa an chawitir.

Ramvah khap

Lawngtlai district magistrate Cheemala Siva Gopal Reddy chuan thupek chhuahin, an district chhungah sava leh ramsa veh/kah khap a nih thu an puang a, "Lawngtlai district-ah ramvah leh sa pelh hi engtik lai mahin The Wildlife Protection Act, 1972 chuan a phal lo a, danin a phal loh thilte ti lo turin mi tin ngen leh hriattir an ni," a ti.

Nunphung zirho

Serchhip DC Paul L Khuma hoin nimin khan DC office-a thawkte pualin 'Soft Skills and Communication Training' buatsaih a ni. Office-a thawhhona boruak ṭha siam dan, dawrtute dawnsawn dan, hruaitu ṭha ni tura thil pawimawh, hun vawn dik, harsatna a thlena inremna kawng zawn dan, sorkar leh mipui rawngbawlnaa thil thar ṭha zawk ngaihtuah chhuah dan, hawihhâwmna leh awm dan mawi chungchangte zirho a ni.

Adoption awareness

Siaha District Child Protection Union chuan nimin khan MADC Golden Jubilee Hall, Siahaah Adoption Awareness Month hawnna inkhawm an buatsaih a, MADC sorkara SWD changtu executive member T Seido khuallian a ni. Awareness thupui chu ‘Rehabilitation of older children through foster care and foster adoption’ tih a ni a; khuallianin thu a sawi bakah, Siaha Child Adoption Centre (SCAC) coordinator TT Sabina-in SCAC din dan, kalphung leh dan anga fa lâk dante a sawi.