Bana Kaih-ah dilna 6,010 a lut tawh; Ṭanpuina hmu tur an thlang dawn hnai

Sorkar flagship programme, Bana Kaih (Handholding) Scheme hnuaiah November 4, 2024 thleng khan progress partner (ṭanpuina dawngtu) ni turin dilna 6,010 a lut tawh a; November 2024 tawp lamah ṭanpuina (loan) hmu turte thlan tum a ni.

Bana Kaih (Handholding) hnuaia dilnate chu an project kaihhnawih sorkar department-te'n endika an thlitfim hnuah Handholding Scheme-a thuneitu sang ber (apex body) - Mizoram State Policy Coordination Committee (MSPCC)-in ṭanpuina dawng turte a thlang dawn a ni.

Vanglaini palai zawhna chhangin MSPCC hotute chuan, Bana Kaih hnuaiah November 4, 2024 thleng khan progress partner ni tura dilna 6,010 a luh tawh thu an sawi a, "Dilna lut tawh zinga 5,961 chu mimal dilna a ni a, pawl anga dilna 49 a awm. Dilnate hi an project kaihhnawih department tina a khawihtu nodal departmental committee-in an endik mek," an ti.

MSPCC hotute chuan, department-te'n dilna zinga hmu tlak nia an ngaihte chu MSPCC-ah ṭanpuina hmu turin an rawt (propose) dawn tih an sawi a, "Department-te hi tun thla (November) ni 15 hian an propose turte rawn thehlut phawt turin kan ti a, an rawn propose-te chu tun thla tawp lamah ngaihtuah kan tum," an ti a; progress partner tura thlante tan training buatsaih a nih dawn thu leh training zawhah loan pek a nih dawn thu an sawi.

Bana Kaih hnuaiah hian scheme kalpuitu implementing department 16 a awm a; chu'ng department 16-ah chuan eizawnna tur trade 155 a awm.

November 4, 2024 thlenga dilna lut 6,010 zinga 2,312 (38.47%) chu Commerce & Industries department hnuaia dilna a ni a; Commerce & Industries department-ah hian trade hrang hrang 43 a awm a, implementing department 16 zinga trade tam berna a ni.