Larsapin Nasha Mukh Bharat a hawng

Governor Dr Hari Babu Kambhampati chuan nimin khan Raj Bhavan-ah 'Brahma Kumaris, Mizoram' kaltlanga ruihhlo do hmalakna kalpui tur Nasha Mukh Bharat Abhiyaan (NMBA) a hawng a; ruihhlo laka fihlim tur leh a ṭhat lohnate mi dang zirtir turin zirlaite a chah.

Dr Hari Babu Kambhampati chuan, Mizoram chu hmun ralmuang leh hmasawnna tehfung hrang hrangah a ṭhat thu a sawi rualin, "Ruihhlo leh a kaihhnawih hrang hrangte'n ṭhalai leh zirlaite nun thûk takin a luhchilh a, a pawi tak zet a ni," a ti.

Governor chuan, "Ruihhlo do kaihhnawiha hma latu sorkar, kohhran leh NGO, a bikin YMA-te'n hmalakna an kalpui mek hi a lawmawm; hei aia lian zawk leh awmze nei zawka ṭanghoa hmalak a ṭul," a ti a; ruihhlo laka fihlim tum tur leh a ṭhat lohnate mi dang zirtir turin zirlaite a chah.

Brahma Kumaris-te chu ruihhlo do beihpui kalpui mek atana thâ tichaktu an nih ngei a beisei thu sawiin Larsap chuan, "Brahma Kumaris-te hi rinna leh ngaihtuahna sàwrbingna lam thupuia neia hma la ṭhin tia hriat an ni a, nun dan hrisel chawi lâra a taka an nunpui ṭhin chuan an tumruhna leh inthunun theihna a nemnghet a ni," a ti.

Governor chuan, ruihhlo donaa hmalakna hmanraw hrang hrangte ṭangkai zawka hman thiam tum turin Mizoram mipui a chah a; ruihhlo donaa hma latu zawng zawngte pawh thâ thlah loa phûr taka theihtawp chhuah zel turin a fuih bawk.

Hawnna inkhawmah hian Brahma Kumaris, Aizawl centre incharge Rajyogini BK Narmada chuan inlawmna thu a sawi a; Delhi aṭanga lokal mithiamte'n thu an sawi. Mizoram University vice chancellor Prof. Dibakar Chandra Deka, tlawmngai pawl aiawh, Brahma Kumaris, zirtirtu leh zirlaite an tel a; ruihhlo laka Mizoram a fihlim theih nan thutiam an sawi rual a ni.

Ministry of Social Justice and Empowerment leh Brahma Kumaris-te chuan March 4, 2023 khan zirlai, hmeichhia leh ṭhalaite zinga ruihhlo do hmalakna nei turin thawh dunna thuthlung an ziak a ni.