SEDP Industrial Development Board-in Kum 2 chhungin Rs. 25,41,907 hmang
Mizoram sorkarin board a din zinga Industrial Development Board chuan sorkar flagship programme SEDP dawng thei tur leh dawng thei lo tur tehfung (criteria) an siam tawh a; kum hnih chhungin sum Rs. 25,41,907 an hmang tawh.
RTI Act hmanga zawhna, Commmerce & Industries SPIO-in a chhan dànin, Industrial Development Board member-te chu din a nih aṭangin ṭum ruk an ṭhukhawm tawh a; SEDP hnuaia ṭanpuina dawng tur tehfung an duang tawh a ni.
An hnuaia SEDP dawng thei turte chu - 1) India khua leh tui; 2) Mizorama khawsa nghet; 3) a awmna khua/vengah kum 3 tal awm tawh; 4) Mizoram electoral roll-a awm; leh 5) skill based trade atan qualification certificate nei, tihte a ni. SEDP dawng thei lo tur an siamah chuan - sorkar hnathawk nghet, dawrkai lian/hausa, industry changtlung nei sa leh regular taka mi chhawr theite an ni thung.
Industrial Development Board hian IDB in Working Group an din a, Draft Industrial & Investment Policy of Mizoram 2020 an buatsaih bawk a, Mizoram sorkar pawmpui turin hma an la mek. SEDP hnuaia thlai leh thei sâwngbàwlna din tura ṭanpuina dawng thei tur an thlan tawhte chu - sawhthing, aieng, kuhva, lakhuihthei, sapthei, vaimim, oil palm, dragon fruit leh grape-te a ni.
Thlai leh thei lam kaihhnawih ni loa SEDP ṭanpuina dawn theihna tur an thlang tawh bawk a; puanṭhui, lu meh, puantah, dawr (grocery/petty), thingpui dawr, rangkachak lam chi chher, pheikhawk chhe siam, carpentry, beauticulture, electronic repairing, two wheeler workshop, automobile workshop, steel fabrication, alluminium work, other micro enterprise tihte a ni.
Industrial Development Board chuan, Ministry of MSME hnuaia MSE-CDP scheme aṭangin Baktawng Carpentry Cluster project tihpuitlin nan state matching share cheng nuai 53, SEDP sum aṭanga pek turin an buaipui mek a; MSE-CDP scheme aṭang thoin Baktawng Alluminium Cluster project tihpuitlin nan state matching share cheng nuai 48.50 pawh SEDP aṭanga pek turin an ruahman siam mek bawk.
J Thankima College-a Industrial Demo Chamber dinna turin cheng nuai 10.80, Phainuama self help group-in clay brick industry an dinna tura nuai 218.18 an dilnate chu SEDP sum aṭanga pek turin SEDP Apex Board-ah dilsak an tum a; Saitual district-ah industrial sstate tur ram a ruahman tawh bawk a ni.
Industrial area awm sate tihchangtluanna tur leh district thar pathumah industrial area thar dinna tur DPR siam turin hma an la a; leilung hausakna hâi chhuah leh seng khawmna turin mineral link road siam turin ruahmanna an siam bawk.