ZPM sorkarah mipuiin rinna an nghat - F Rodingliana

ZPM party chuan nimin khan an pisaah chhung inkhawm an hmang a, thusawitu F Rodingliana, minister of state chuan, ZPM kaihhruai sorkarah mipuiin rinna an nghah thu leh kawlphethaa intodelh turin hma an lak mek thu a sawi.

F Rodingliana chuan, ZPM sorkar beitute chu ZPM din tirha beitute tho an nih thu sawiin, "Min beih rawn chung pawhin Pathian leh mipui zarah hnehna kan la chang zel hi Pathianin min hruaizia tilangtu leh Zoram mipuite'n ZPM ministry-ah rinna an nghah thûkzia tilangtu a ni a; min beihnate hi kan party tan malsawmna a ni," a ti.

Ram rorelnaa Pathian ram tun din an tumzia mipuite'n an hriatpui chuan a tâwk thu sawiin Rodingliana chuan, "Eptu party-te'n dâwt leh thu tling lo hmanga min beihnaah hian buai tur kan ni lo," a ti a; an lamah Pathian leh mipui an ṭan chuan a tâwk thu a sawi.

Power & Electricity Minister chuan, Mizoramin kawlphetha a mamawh san lai berin megawatt 163 a mamawh thu leh kawlphethaa intodelh turin nasa taka hma an lak thu a sawi a, "Department lama kan thawhpuite pawhin ngaihtuahna an sêng nasa hle a, rim taka kan policy tihlawhtling tura ṭan an laknaah lawmthu ka sawi a ni," a ti.

POWER MINISTER-IN POWER PROJECT A SAWITE

* Tuirini project-ah sorkar hmasate'n project an lo hnâwl tawh chu DPR kan keu thar leh a, central lama kan tlân thlakpui hnuah tihnunin a awm leh ta.

* Tuivai project kan buaipui leh a, kum 18 chhung sorkar hmasa lamin a bu an lo keu tawh loh leh DPR hlui tawh tak chu kan tharthawh leh. Tuikhuahin a chim chin tur kan tihniam a, km. 32 chin khuapin, Manipur tibuai loin MW 160-180 thar theih kan inbeisei. He project atan hian Central-in cheng vaibelchhe 2.80 min pe a, thla 18 chhunga zo turin inremna kan ziak.

* Tlawng leh Tuichang khuap turin hma kan la mek. Tuichang DPR kan peih thawkhat tawh a, MW 52 chhuak thei turin ruahmanna kan siam.