Japan rama hna thawk turte VISA hlân

Mizoram Youth Commission (MYC) chairman Malsawmzuala Ralte chuan November 6, Nilaini tlai khan Hotel Regency-ah Hrangbana College Career & Placement Cell, North Easterns Educational Consultancy leh Veda School of Learning-te thawhhona hmanga Japan rama hna thawk tura sawmna (job offer) hmu mi 34 zinga mi pasarih hnenah Japan rama an kalna tur visitor's international stay admission (VISA) a hlan.

HBC Career & Placement Cell, NEEC leh Veda School of Learning chuan India sorkar leh Japan sorkarin January 18, 2024 khan thawhhona thuthlung, Memorandum of Cooperation for Skilled Workers an ziah tawh angin November 2023 aṭang khan Japanese ṭawng zirna an buatsaih. Ṭawng zirnaa zirlaite chu Japan rama company, hna thawk tur mamawhte'n interview kaltlangin an rawn thlang ṭhin a ni.

Job offer hmu mi 34 zinga VISA dawng mipa pathumte chu Fukuoka-ah semi automatic welding hna thawkin, overtime tel loin Rs 90,000 vel hlawhin an thawk dawn. Hmeichhe palite chu machine inspection hna thawkin Kuwana, Mie Province-ah an awm dawn a, Japan pawisa (Yen) 1,60,870 vel an hlawh dawn bawk.

Malsawmzuala Ralte chuan, Japan rama kal turte chu an tum tiruh turin a chah a, "Ram dangah ram hmel lanna in nih dawn avangin taimakna leh tumruhna chhawm nung zel ang che u," a ti a;' HBC Career & Placement Cell, North Easterns Educational Consultancy leh Veda School of Learning-te thawhhona chu hlawkthlak a tih thu a sawi.