PUC adopted village Sailam hawng

Pachhunga University College (PUC) chuan kum 2024-2026 chhunga adopted village (khaw chuam) atan Sailam an thlang a, nimin khan a hawnna hun hmangin, Higher & Technical Education minister Dr Vanlalthlana'n a hmanpui.

PUC hian 2012 aṭang khan adopted village an lo nei tawh a; zirtirtute'n pawisa thawh khawmin, kawng hrang hrangin adopted village zirchianna an kalpui a, a theih ang angin an ṭanpui ṭhin. Adopted village-a lehkha thiam thei deuhte chu PUC-a zir zawm dan an ruahman ṭhin a, zirlai leh upa lam tan Aizawla zirna lam hmun pawimawh tlawhte leh thil dangte an an ruahmansak ṭhin bawk.

Kum 2024-2026 chhungin PUC adopted village Sailam hi Aizawl district-a Aibawk RD block chhunga awm a ni a, chhungkaw 179 an cheng mek. Adopted village a nih chhungin PUC-a department hrang hrangte'n anmahni hmazawn ṭheuhah Sailam khua leh a ram chin dinhmun an zir chiang dawn a ni.

Sailam hi PUC adopted village pangana a ni a, a hmain Phulpui, Lungleng-I, Dulte leh Khawrihnim khuate an lo hmang tawh a ni.