Aadhaar card siam dan tur zirho

Mizorama district hospital, sub-district hospital leh community health centre-a operator atana ruat tharte tan nimin khan Unique Identification Authority of India hnuaia Birth Registration Based Aadhaar Enrollment (BRBAE) chungchang zirhona Directorate of Health Services conference hall-ah buatsaih a ni.

Zirhona hawnna inkhawm hi National Health Mission (NHM) state nodal officer Dr R Lalchhuanawma'n kaihruaiin, training hawngtu Health Services director Dr Hmingthanmawii'n thu a sawi a; GAD deputy secretary Lalrohlua'n BRBAE pawimawhna leh ṭhatna a sawi. NHM hnuaia operator-te hian kum 5 hnuai lamte a thlawnin Aadhaar card an siamsak dawn a ni.

UIDAI chuan kum 2023 khan enrollment agency atan NHM a ruat a, mission director chu registrar niin, nodal officer leh enrollment agency-te'n an pui. Damdawi-ina birth registration tite Aadhaar card siamsak theih a nih chuan naupang kum 0-5 inkarte Aadhaar enrollment nasa taka a pun beisei a ni.

State Health Management Information System-in a tarlan danin, Mizorama nau piang zawng zawng zinga 90% chu damdawi-ina piang (institutional delivery) an ni.