Eirawngbawlna gas man bithliah

Indian Oil Corporation Limited (IOC)-in eirawngbawlna gas (LPG) man a tihchhuah thar zûlzuiin Mizoram Food, Civil Supplies & Consumer Affairs (FCSCA) department chuan gas man thar a bitliah a, November 1, 2024 khan hman ṭan a ni.

FCSCA department tarlan danin, Vairengte tih loh hmun dang zawngah domestic cylinder (kg. 14.2) man Rs 955, commercial cylinder (kg. 19) man Rs 2,254.50, XtraTej (kg. 19) man Rs 2,277 leh composite (kg. 10) man Rs 688.50 a ni. Vairengteah domestic cylinder Rs 946, commercial cylinder Rs 2,239.50, XtraTeJ Rs 2,262 leh composite Rs 678.50 a ni thung.

Aizawl leh district headquarters-ahte home delivery kalpui tur a nih avangin, home delivery a nih chuan domestic cylinder-ah a man pangngai aṭangin Rs 70 aia tam lo belh tur a ni a; agency/distributor kudama hralh a nih chuan a man pangngai aṭangin Rs 33.43 paih tur a ni thung. Home delivery la kalpui lohna, point delivery kalpuinaah chuan a man pangngai aṭangin Rs 7.53 belh tur a ni.

LPG distributor-te'n an châwm thingtlang khuaah chuan, khaw hlat zawng leh pawisa chawi belh ngai zat chu January 21, 2015-a sorkar thupekin a tarlan anga chhût tur a ni bawk.