India ram fangtu lawmpuina hlân

Mizoram Pollution Control Board (MPCB) chuan November 6, Nilaini khan Woodland Hills-ah 'Ride to Clean Air' tih thupui hmanga thirsakawra India ram fang chhuaktu Vanlallawmzuala Varte chawimawina leh lawmpuina hun an hmang a; Environment Forest & Climate Change minister Lalthansanga'n hmanpuiin, thangchhuah diar a hlân.

Minister Lalthansanga chuan, Vanlallawmzuala'n India ram fang chhuak tur khawpa tumruhna leh thawhrim nachang a hria chu fakawm a tih thu leh amah pui tura MPCB thlan nachâng a hria chu finthlâk a tih thu a sawi a, "MPCB hi Mizoram tana tihchangtlun zel a ṭul a, kan hrisel zawk nan Mizote hian thirsakawr khalh emaw, taksa insawizawina atana ṭha infiamna eng chi emaw ber pawh ni se kan tuipui a ṭul," a ti.

Inkhawm hi MPCB chairman Liankima Lailung-in a kaihruai a, Vanlallawmzuala pawhin thu a sawi. MPCB member secretary C Lalduhawma kaihhruaiin zawhna leh chhânna hun hman a ni bawk.

MPCB hi Ride to Clean Air All India Tour main sponsor a ni a, January 25, 2024 khan MINECO aṭangin MPCB chairman Liankima Lailung-in a vailiam a ni.