KHAWTHLIR

Pastor conference

Evangelical Free Church of India (EFCI) chuan November 5-7, 2024 chhung khan Chaltlang Tourist Lodge-ah Pastors' Conference an hmang a, EFCI Moderator hoin pastor 99 an tel. Conference thupui chu 'Embracing challenges for kingdom growth' tih a ni.

Deliver lo turin hriattir

Serchhip DC Paul L Khuma chuan thupek chhuahin, online hmanga hâlpuah, hâlmawi leh naupang silai lem, a mu kap chhuak thei chi chahte chu pe (deliver) lo turin online hmanga thil chah thlenna hmun courier service leh dâk-in (post office)-te a hriattir. DC chuan, "Thupek bawhchhia/zâwm lote chu BNS 2023 Section 223 hmangin kum khat lung-in tantir emaw, Rs 5,000 chawi thlenga hrem theih a ni," a ti.

Kawng khâr dawn

Aizawl Traffic SP Stephen Lalrinawma chuan vawiin leh naktuk hian zing dar 8 aṭanga tlai dar 5 thleng Venghnuai Presbyterian Kohhran biak-in aṭanga Venghnuai khelmual inkar kawng siamṭhat hna thawh a nih dawn avangin, kawng hi hna thawh chhungin khâr a nih dawn thu a tarlang.

NCST member nen inkâwm

National Commission for Scheduled Tribes (NCST) member Nirupam Chakma chuan November 6, Nilaini khan Chaltlanga State Guest House-ah Social Welfare, Tribal Affairs and Women & Child Development department hotute leh thawktute a kâwm. Nirupam Chakma chuan, NCST chu India danpui hnuaia scheduled tribe-te dikna leh chanvo humhalha en zui tur leh kawng hrang hranga an hmasawnna chungchanga sorkar laipui thuràwn pe tura din a nih thu a sawi a; NCST Commission hotute'n January 2025 tawp lamah Mizoram an tlawh dawn thu a sawi bawk.Inkawmhonaah hian sorkar hotute chuan, tribal tana hamṭhatna hrang hrang an kalpui meka harsatna an tawh te, an duhkhawp lohte leh rawtnate an sawi a; Nirupam Chakma chuan ziaka NCST-a thlen turin a ràwn a ni.