COVID-19: Mizoram dinhmun Ni 2 chhungin hripui vei 46 hmuh a ni

Mizoramah December 4, Zirtawpni khan Covid-19 vei mi 25 hmuh chhuah a ni a, December 5, Inrinni khan mi 21 hmuh chhuah a ni bawk a; ni hnih chhungin mi 46 hmuh chhuah a ni. Inrinni leh nimin khan hripui laka fihlim tawh mi 33 chhuahtir an ni thung.Covid-19 vei Zirtawp­nia hmuh chhuahte chu mipa 17 leh hmeichhia pariat an ni a; ZMC labora­tory-a hmuh mi pasarih, TrueNAT-PCR hmanga hmuh mi 12 leh Rapid Antigen Test (RAT) hmanga hmuh mi paruk an ni. Inrinnia hmuh chhuahte chu mipa 15 leh hmeichhia paruk an ni a; ZMC-a hmuh mi panga, TrueNAT hmanga hmuh mi pali leh RAT hmanga hmuh mi 12 an ni.

Inrinni leh nimin khan hripui laka fihlîm tawh mi 33 chhuahtir an ni. Inrinni khan Aizawl district-ah mi pariat, Champhaiah pahnih, Serchhipah pa­thum leh Lawngtlaiah panga an chhuak a; nimin khan tlai dar 5 thlengin SRH-ZMC aṭangin mi pali, Champhaiah pali leh Serchhipah pasarih an chhuak bawk.

Mizoramah Covid-19 positive mi 3,934 hmuh chhuah a ni tawh a, mipa 2,900 leh hmeichhia 1,034 an ni. Nimin tlai dar 5 thleng khan mi 3,723 (94.64%) chhuahtir an ni tawh a, mi paruk (0.15%) thi tawhin, enkawl mek mi 205 (5.21%) an awm.

Mizorama Covid-19 positive hmuh chhuah tawh mi 3,934 zinga mi 1,848 chu Mizoram chhunga kái an ni a, mi 2,086 chu state páwn aṭanga rawn lût an ni.

December 4, Zirtawpni khan Mizoramah swab sample 1,350 endik a ni a, ZMC-ah mi 449, TrueNAT-PCR hmangin district pasarihah mi 168 leh RAT hmangin district 11-ah mi 733 endik a ni. Mi 1,350 zingah Covid-19 positive mi 25 an awm a, natna (symptom) lang chhuak pathum a awm. Mi 11 chu Mizoram chhunga kai an ni a, kai ṭanna hriat loh pahnih an awm.

December 4, Inrinniah swab sample 1,144 endik a ni a; ZMC-ah mi 410, TrueNAT-PCR hmangin district pasariha mi 206 leh RAT hmangin district pakuaa mi 528 endik aṭangin Covid-19 vei mi 21 hmuh chhuah a ni. Mi 21 zinga 11 chu tualchhunga kái an ni a, hri kài ṭanna hriat loh mi pahnih an awm a, symptom pathum an awm bawk.

December 4-a hmuh chhuah:

Sorkar thuchhuah tarlan danin, December 4-a ZMC laboratory-a Covid-19 positive hmuh chhuah mi pasarihte chu mipa pathum leh hmeichhia pali an ni a; an vaiin tualchhunga kai vek niin, naupang kum 10 mi pahnih an tel bakah, kum 60 tling tawh mi pathum an tel.

TrueNAT-PCR hmanga hmuh chhuah mi 12-te chu mipa vek an ni a, Lungleiah pakua, Mamitah pahnih leh Kolasib-ah pakhat hmuh chhuah a ni. An vaiin Mizoram pawn aṭanga rawn lut thar vek an ni a; Covid-19 symptom nei an awm lo.

RAT hmanga hripui vei hmuh chhuah parukte chu mipa pali leh hmeichhia pahnih, kum 18-45 inkar an ni a; an zinga pali chu Mizoram chhunga kái an nih laiin, mi dang pahnih chu state páwn aṭanga tun hnaia rawn lut an ni.

December 4-a hmuhte dinhmun:

ZMC LABORATORY

Sihphir Venghlun - 6: Mipa kum 10 (pahnih) & 67, hmeichhia kum 27, 60 & 62. Kai ṭanna hriat, pakhatin symptom a nei.

Edenthar Veng - 1: Hmeichhia kum 39, result tihchhuah laiin chanchin kimchang la hriat loh.

TRUENAT-PCR

South Lungrang - 3: Mipa kum 23, 26 & 30, APS Hydro hnuaia thawk, Bihar aṭanga rawn lut, South Lungranga an camp-a khung hran mek.

BSF, Melte - 6: Mipa kum 30, 32, 34, 37, 44 & 56. State pawn aṭanga tun hnaia rawn lut vek, 131 Bn. BSF camp, Melte-a khung hran lai vek.

Bilkhawthlir - 1: Mipa kum 39, Assam aṭanga lut, quarantine facility-a awm lai.

Mamit Vengthar - 1: Mipa kum 38, Assam aṭanga haw, quarantine facility-a awm mek.

Serhmun - 1: Mipa kum 24, Jharkhand aṭanga rawn lut, Serhmun RMSA School-a khung hran lai.

RAT HMANGA HMUH

Bawngkawn - 1: Hmeichhia kum 39, Lawngtlai College-a thawk; symptom nei, hri kài ṭanna hriat loh.

Mission Vengthlang - 1: Hmeichhia kum 26, Delhi aṭanga lo kal, Lengpui Airport screening point-a hmuh chhuah, symptom nei lo.

Ramhlun Venglai - 1: Mipa kum 28, Delhi aṭanga haw, Lengpui Airport-a hmuh chhuah, symptom nei lo.

Lunglei Venglai - 1: Hmeichhia kum 13, kal chhuah a ngaih vanga sample test, hri kaina hriat loh, symptom nei lo.

Paithar - 2: Mipa kum 18 leh hmeichhia kum 27. Hri kai ṭanna hriat ve ve; hmeichhiain symptom a nei.

December 5-a hmuh chhuah:

Sorkar thuchhuaha a danin, December 5-a ZMC laboratory-a Covid-19 positive hmuh chhuah mi pangate chu Aizawl district-a mipa, state páwn aṭanga haw vek a ni a, Covid-19 symptom nei pathum an awm.

TrueNAT-PCR hmanga hripui vei hmuh chhuahte chu mipa pathum leh hmeichhia pakhat an ni a, kum 28-57 inkar an ni. An zinga pakhat chu tualchhunga kái a nih laiin, pathum chu state pawn aṭanga rawn lut an ni a; November thlaa Bihar Assembly inthlana duty pakhat a tel.

RAT hmanga Covid-19 vei hmuh chhuah mi 12-te chu mipa pasarih leh hmeichhia panga an ni a, naupang kum 11 mi pathum, kum 14 mi pahnih leh kum 15 mi leh kum 17 mi pakhat ve ve an tel. An zinga pahnih chu tualchhunga kái an ni a, mi 10 chu state páwn aṭanga rawn lut thar an ni.

December 5-a hmuhte dinhmun:

ZMC LABORATORY

Kanan Veng - 1: Mipa kum 35, Manipur aṭanga haw, quarantine facility-a awm mek, symptom nei.

Mission Vengthlang - 1: Mipa kum 40, Manipur aṭanga haw, SAI, Mission Vengthlang QF-a khung hran lai, symptom nei.

Zotlang, Aizawl - 1: Mipa kum 24, Arunachal Pradesh aṭanga haw, QF-a awm lai, symptom nei.

Sihhmui - 1: Mipa kum 16, tun hnaia Manipur aṭanga haw, QF-a awm mek, symptom nei lo.

BSF, Aizawl - 1: Mipa kum 56, 90 Bn. BSF mi, Punjab aṭanga rawn lut, QF-a awm, symptom nei lo.

TRUENAT-PCR

Lunglei Luangmual - 1: Mipa kum 38, tualchhunga kai, symptom nei lo.

BSF, Melte - 1: Mipa kum 57, Rajasthan aṭanga rawn lut, 131 Bn. BSF camp, Meltea khung hran lai, symptom nei lo.

1st IR, Mualvum - 1: Mipa kum 51, Mualvùma 1st IR police. Bihar inthlana duty zo rawn haw, a haw hlima RAT-a endiknaa negative tawh, TrueNAT-PCR hmanga endik nawnnaa positive a ni. Positive a nih avanga CCC-a awm, ni 10 awm hnua RAT hmanga endiknaah a negative vanga chhuahtir a ni a, ngaihṭhat loh vanga mahni duh thua TrueNAT-PCR hmanga endik nawn leh, positive tih hmuh chhuah nawn leh a ni. Symptom a nei lo.

Chhingchhip - 1: Hmeichhia kum 28, Sainik School, Chhingchhipa zirtirtu, Uttar Pradesh aṭanga rawn lut, QF-a awm lai, symptom nei lo.

RAT HMANGA HMUH

Electric Veng - 1: Hmeichhia kum 29, Guwahati aṭanga haw, Lengpui Airport screening point-a hmuh, symptom nei lo.

ITI Veng - 1: Hmeichhia kum 23, Guwahati aṭanga haw, Lengpui Airport-a hmuh chhuah, symptom nei lo.

Lunglei Lunglawn - 2: Mipa leh hmeichhia kum 14 mi ve ve, an kal chhuah a ngaih vanga sample test, symptom nei lo, hri kài ṭanna hriat loh ve ve.

Lawngtlai Council Veng - 8: Mipa kum 11 (pahnih), 15, 20, 35 & 38, hmeichhia kum 11 & 17. Kai ṭanna hriat, symptom nei lo vek.