Kolasib-ah MJA conference hmang

14th May, 2015

Mizoram Journalist Association (MJA) chuan nimin khan Kolasib-a IPR Conference Hall-ah General Conference vawi 42-na an hmang a, Environment & Forest minister Lalrinmawia Ralte khuallian niin, Kolasib DC Juitendar Yadav khualzahawm a ni.

Minister Lalrinmawia Ralte chuan journalist tan a nachang hriat a pawimawh tih sawiin, "Hnam dangte chuan an ram leh hnam a mualpho ai chuan thup tur thup a, pholan tur pholan an thiam hle. Chanchinbmite hian thu lakna an uluk a ngai a, mipui hnena thu dik leh entawntlak pe tur in ni," a ti a; chanchinbumite chu mipuite thil ṭha zirtirna lama ṭan la turin a chah.
Lalrinmawia Ralte chuan, Mizoramah hmasawnna a lut zel dawn tih a sawi a, "Kan inbuatsaih lâwk loh chuan, malsawmna tura kan ngaih hi kan chhiatpui thei. Hmasawnna hmachhawn tur hian kan lo inbuatsaih lâwk a ṭul hle a ni," a ti.
Khuallian Lalrinmawia hian MJA flar thar a tlangzarh nghal a ni.
Kolasib DC Jitendar Yadav pawhin thu sawiin, media chu mipuite'n ngaihdan an siamna a nih avangin ṭangkai leh pawimawh tak a ni a, thu chhuahah uluk a pawimawh tih a sawi.
MJA president Vanlalrema Vantawl chuan MJA chu eizawnna vanga intêlkhawm a ni tih a sawi a, "Kan ṭanrual chuan he pawl hi a zahawm zel dawn a, a chhiat leh a ṭhat chu kan kutah a innghat. Hamṭhatna ûm luat vanga pawl tihhmélhem a hlauhawm a, fimkhur a ṭul," a ti.
MJA Conference-ah hian an member nunna chán Lalruatpuia Zadeng (JB Cable), Lunglei; DK Sona Hnialum (Lawngtlai Post), Lawngtlai leh, Laldinthara (LPS), Aizawlte sûnna hun hman a ni.
Chawhnu lamah rorel inkhawm neih a ni a; IPR director Jim K Chozah hoin Mizoram Jounalist Welfare Society chungchang an sawiho bawk.
MJA thurel zingah, "District tina IPRO office awmte hi tun aia tihchangtlun a nih theih nan hmalak ni rawh se," tih a tel.
MJA inkhawmpuia kalte hian vawiinah Bukvanneia Oil Palm Mill leh Vairengtea Counter Insurgency & Jungle Warfare School-te an tlawh dawn a ni.
MJA-ah hian member 211 an awm mek a; district tina MJA member awm zat chu - Aizawl district-ah mi 88, Lunglei district-ah mi 31, Champhai district-ah mi 19, Serchhip district-ah mi 16, Mamit district-ah mi 15, Saiha district-ah mi 13, Kolasib district-ah mi 20 leh Lawngtlai district-ah mi pakua an ni.