Mizoram Governor thar atan Lt. Gen. Nirbhay Sharma ruat

Sorkar laipui chuan Mizoram Governor turin Arunachal Pradesh Governor ni lai Lt.Gen. Nirbhay Sharma a ruat thar a, Governor term kum thum a la neih chu Mizorama hmang zo tura tih a ni.

Thu dawn danin, Mizoram Governor atana Lt.Gen. Nirbhay Sharma ruat a nih thu hi President pawhin a tichhuak tawh a; mahse amah hian a pawm leh pawm loh hriat a la ni lo.

Mizoram Governor atana Lt.Gen. Nirbhay Sharma ruat a nih rual hian, Jharkhand Governor atan Droupadi Murmu, Arunachal Pradesh Governor atan JP Rajkhowa, Tripura Governor atan Tathagata Roy, Meghalaya Governor atan V Shanmuganthan, Manipur Governor atan Dr Syed Ahmed-te ruat an ni bawk.

Lt.Gen. Nirbhay Sharma hi kum 1946-ah Lucknow, Uttar Pradesh-ah a piang a, National Defence Academy-a zir chhuak niin, kum 1966-ah sipai officer-ah a lut a, hmarchhak state-ahte pawh a lo thawk tawh ṭhin a; sipai hnaah mi chhuanawm tak a ni.

Sipaia kum 40 a ṭan hnuah pension in, Union Public Service Commission member-ah ruat zui a ni a; May 29, 2013-ah Arunachal Pradesh Governor hna a thawk ṭan. Governor hna thawk tur hian kum 2018 thleng hun a la nei a ni.

Lt.Gen. Nirbhay Sharma hi July 2014-a Vakkom Purusothaman-a'n Mizoram Governor hna a chhuahsan hnua Mizoram Larsap atana ruat pasarihna a ni. Vakkom Purusothaman hnua Mizoram Larsap tura ruatte chu - Kamla Beniwal, K Sankaranarayanan, VK Duggal, KK Paul, Aziz Qureshi leh Keshri Nath Tripathi te an ni.