Eklavya Model Residential School hawng

Mizorama Eklavya Model Residential School (EMRS) pahnihna, Serchhip Kawlritlanga sak thar chu nimin khan chief minister Lal Thanhawla'n a hawng. EMRS hi India ram hmun kilkhawra tribal chhungkaw rethei leh harsaa naupang lehkha zir duhte tana Union Ministry of Tribal Affairs hnuaia din a ni.

Chief Minister chuan, Mizorama EMRS pahnihna hawn a ni ta chu Mizoram tan hmasawnna rahbi thar a ni tih sawiin, "Kum 2008-a Lungleia EMRS din tawh chu kan ṭangkaipui hle a ni," a ti a; Serchhipa EMRS pawh naupangte tana ṭangkai tak a nih a beisei thu a sawi.

CM Lal Thanhawla chuan, Mizote'n thil ṭha duh mah ila a enkawlnaah kan taimak tâwk loh thu sawiin, "Sikul thar hi a thar anga vawn fai reng a ṭul a, mi tinin mawh kan phur a ni. Sikulin hmunhma ṭha leh infiamna hmun a neih a ṭul a, mahse Mizorama kan sikul tam zawkte hi chu commercial school a nih avangin duhthu a sam thei lo a ni," a ti.

Central aṭanga sum lo kalte chu state sorkarin thuneihna a nei lo tih sawiin, Lal Thanhawla chuan, "Sum min pekte a titawp emaw, a khaihlak cháng a awm emaw a nih hian lo nawrh ngawt chi a ni lo," a ti a; thlen chin aṭanga hmasawn tum tur a ni tih a sawi.

Sikul ṭan hma chung­chang sawiin, Chief Minister chuan, "Sikul ṭan hma hi ram changkangte chuan ṭangkai thei ang bera hun hman an duh avangin zíng takah sikul an ṭan a, India rama state tam tak pawhin hma takah an ṭan a ni. Sikul ṭan hma kan kalpui hi enchhinna a ni a, kan hnam tan a ṭha lo a nih chuan a aia ṭha zawk kan dap mai tur a ni," a ti a; zirtirtute chu inthlah­dah lo a, enkawlnaah thâ thlah lo turin a chah.

Khualzahawm, Social Welfare minister PC Lalthanliana pawhin thu sawiin, EMRS building-te chu chhuanawm a tih thu a sawi a, a satu PWD leh contractor-te chungah lawmthu a sawi a; chutih rualin, EMRS hlawhtlinna chu building-ah ni loin, zirtirtute leh zirlai naupangteah a innghah thu a sawi.

Sports minister Zodin­tluanga chuan EMRS Serchhip tan table tennis board, volleyball leh a net leh infiamna lama mamawh dangte pek a nih tur thu a sawi.

EMRS-ah hian pawl 12 thleng zir theih a ni dawn a, zirlaite chu hostel-ah an awm vek ang. Naupang pakhat enkawl nan kum khatah Rs. 42,000 dah a ni.

Serchhipa EMRS din nan Ministry of Tribal Affairs chuan July 12, 2012-ah Mizoram sor­karah cheng vbc. 12 a pe a, March 2013-ah sikul sak ṭan a ni. Tunah hian middle school thleng kalpui ṭan a ni a, zirlai 50 chuang an awm mek a ni.