Armed Forces Flag Day pualin Governor-in thuchah a tichhuak

Vawiin December 7 hi Armed Forces Flag Day a ni. He ni pual hian Governor PS Sreedharan Pillai chuan thuchah tichhuakin, "He ni pawimawh tak hi min venghim tura kan tana nun lo hlan tawhtu sipai huaisen, kan pasalṭhate leh tuna kan sipai ni mekte hi mipuite'n kan thlàwp tlat a ni tih kan lan chhuahtirna hun a nih bakah, anmahni chawimawina leh zahna kan lantirna hun a ni," a ti.

Governor chuan, sipai rualte chu min venghimtu leh kan thlamuanna an ni tih sawiin, "Anni hi vûr hnuaiah leh khaw vâwt karah te, ei leh in tur mumal awm remchan lohna hmun bakah hun khirhkhàn tak tak karah pawh ram tan rinawm taka ding tlat ṭhin an ni. Engtik lai pawhin khawmualah, tuipui chung leh boruakahte kan ram venhim hna an thawk reng," a ti a; nula leh tlangval huaisen, ram veng him tura nuna hlàntute inpeknate hre thar leh turin mipui a chah.

Armed Forces Flag Day pual hian khua leh tui zawng zawngte chu ṭanpuina thilpek phal taka pe turin Larsap chuan mipui a sáwm a, "Kum danga kan tih ṭhin angin, kumina Flag Day pual hian Mizoram pumah vehbûr khawn mek a ni. Thinlung inhawng taka kan sipaite puala thawhlawm thawh ṭheuh turin kan insáwm a ni," a ti.

Governor chuan, ram leh hnam venhimna atana nunna hlàntute zahna chibai bûk thar leh a, an kalsan tâk an chhungte ṭha taka tuamhlâwm chu mipui mawhphurhna a ni tih hre thar turin mipui a chah bawk.