Sorkar hnathawk tan pawl/kohhrana inhman dan tâwk thiam a ṭul - CM

Chief minister Lalduhoma chuan, sorkar hmalakna hrang hrangah sorkar hnathawkte'n ṭha taka an thawhpui an beisei thu leh sorkar hnathawk tan pawl leh kohhrana inhman dan tâwk thiam a ṭul thu a sawi.

CM Lalduhoma hian nimina Administrative Training Institute auditorium-a Mizoram Secretariat Service Association (MSSA) General Conference vawi 19-na a hmanpuinaah thu sawiin, "Kalphung ṭha zawk duha au ṭhin kan nih ang ngeiin kan sorkar hian mipui tana rawngbawlna ṭha lehzual siam tumin hmalakna kan nei ta nual a, hengahte hian sorkar hnathawkte'n ṭha taka min thawhpui kan beisei," a ti a; sorkar flagship programme Handholding chu ngaih pawimawh hmasaka nei turin a chah.

Sorkar hnathawkte pawl leh kohhrana an inhman nasat lutuk chuan an ni tin hnain a tuar thei tih sawiin Lalduhoma chuan, "Inhman dan tawk kan thiam a ṭha. Thawhpuite kêp ngai reng, mahni thawhna hmuna hmuh harsa tak kan nih a hlauhawm. Kan hna hi kan rawngbawl nana Pathianin min hûnna a ni," a ti a, mahni hna ngai pawimawh tur a nih thu a sawi.

Sorkarin hna thawktu ṭha a neih theih nan department tinah Service Review Committee an dintir thu sawiin Lalduhoma chuan, "Hnathawk thei lo emaw, thawk tlak lo emawte dap chhuak a, a ṭul anga dan anga insingsak kan tum. Sorkar hnathawkte service quality a ṭhat hian kan ram quality a ṭha dawn a ni," a ti.

Chief Minister chuan, rei lo tê sorkarna an chelh tawh chhungin sorkar hnathawk pawlte nen an inkâwm deuh vek tawh tih sawiin, "Service rivalry a nasa hle tih ka hmu a, hei hi tihdal ka duh. Thawkho vek kan ni a, kan hnain a tuar ang tih ka hlau ṭhin. Tuihnâr pakhat ring vek kan ni a, in chanvo hi a awm zel dawn tih hre tlang ang u. Post ruak hnawhkhah kawngah a hnuai lam a kawrawng lutuk niin kan hria a, hei hian nakin zelah harsatna min siam thei a ni," a ti a; sorkar hnathawk hnuai lamte hamṭhatna ngaihthah lo turin a chah.

CM Lalduhoma chuan, information technology a ṭhang tih sawiin, "Hei hi sorkarin hman ṭangkai kan tum a, mipui tana awlsamna thlen zawng zela kal kan duh," a ti a; MSSA chu department tina inzar pharh an nih avangin thawktu pawimawh an nih thu a sawi bawk.

MSSA hi kum 2004-ah din a ni a, sanctioned post 260 neiin, member officer 261 an awm mek a; inkhawmpui hi an president Betsy Zothanpari Sailo-in a kaihruai a ni.