Sports incentive cash award-ah Discipline thliar hran a awm lo - Robert Romawia

Sports & Youh Services minister hlui Robert Romawia Royte, MLA chuan nimin khan Aizawl Press Club-ah thuthar thehdarhtute a kâwm a; infiammi che ṭhate lawmman, sports incentive cash award dawng thei turah sports discipline thliar hran an awm lo niin a sawi.

Robert Romawia chuan, Incentive Cash Award Rules, 2001 chu infiammite duhsakna avangin Mizoram Sports Incentive Cash Award Scheme, 2022 a thlak a nih thu a sawi a, "2001 rules leh 2022 scheme-te hi Mizo infiammite leh sorkara sports enkawltute'n an hre chiang lo hi a pawi ka ti. Incentive cash award dawng thei tur bik sports discipline a awm lo, competition base-a siam a ni," a ti.

Sports incentive cash award-ah sport association-te an fiah tâwk loa a hriat thu a sawiin Robert Romawia chuan, "Sport discipline ni loin, medal an lakna competition zawk a pawimawh. Arm wrestling, carrom board, etc. in an dawng thei lo tihna a ni lo," a ti a; state, national games, Asia huap, international huapa medal an lak chuan eng discipline pawhin incentive cash award an dawn theih vek thu a sawi.

Sports Minister hlui chuan, tun hnaia Asia huap arm wrestling inelnaa medal latute pawh sports incentive cash award dawng thei tur an nih thu sawiin, "Dan a awm sa vek a, dan angin incentive cash award hi pek mai tur a ni. An tan dan thar siam leh 50% pek dan zawn chi-ah ka ngai lo. Sports Minister la ni ila chuan dan awm sa angin gold medalist Rs 7,00,000 leh silver medalist Rs 3,50,000 pek dan ka zawng ang," a ti.

Robert Romawia chuan, national level bikah chuan medal la zawng zawng award pek theih a ni lo tih sawiin, "National level-a medal la incentive cash award dawng thei tur chuan medal an lakna competition buatsaihtu kha Indian Olympic Association-in a recognise a nih a ngai. Chutiang ni lo competition-a medal late chu pek theih a ni lo, danah a huam tel lo," a ti.

Robert Romawia sawi danin, Mizoram Sports Incentive Cash Award Scheme, 2022 ang chuan infiammite chauh ni lo, anmahni hruaitu coaching staff leh official-te pawh a huam a, chungho chuan infiammite sum dawn zat aṭanga 25% an dawng ve thei.

Sports Minister hlui chuan, MNF sorkar laia khelmual siamte a tê lutuk nia sawi sawiin, badminton court leh football ground len zawng tehkhin chu mipui hruai kawi tumna a ni em tih ngaihtuah theih a nih thu a sawi a, "FIFA Law of the Game-ah chuan football field size chi hran hran a siam theih. FIFA standard ding laiah chuan field minimum size chu 45X90 metre a ni a, maximum size metre 90X120 a ni. International match khelhna tur erawh a tê berah metre 100X64 a nih a ngai," a ti.

Mizoram chu hmunin a zir loh avangin duh angin khelmual siam len a harsa thu sawiin RRR-a chuan, "Harsa tak chungin field-te kan tizau zawk. Kan sorkar laia UDPA leh Sports department field siamte kha FIFA standard size vek a ni," a ti a; hmunhma a rem ngang loh avanga international competition thlen theihna tura lian erawh chuan an siam vek theih loh thu a sawi.

ROBERT ROMAWIA ROYTE SAWI DANGTE

☑ MNF sorkar laiin Champhai Chhangphut Field leh C Ṭhuamluaia Mual atan floodlight siamna turin cheng vbc. 8.60 ruahman a ni. ZPM sorkar hlimah restricted tender hmanga Chhangphut Field-a flood light vuah hna thawh a ni tih RTI hmangin ka hmu a, C Ṭhuamluaia Muala floodlight dah tur erawh a reh vang vang a, a ngaihṭhatthlak loh.

☑ PMJVK-ah tun hnaiah central sorkar aṭanga sum release sa Mizoram sorkarin contractor-te hnathawh zawh tawhna bill pe mai loa a hrên khawtlai rei avangin sum an hrên zat aṭanga 7% per annum interest chu a sum hrên chhung atan ni tin chawitir an ni ta hi a pawi.

☑ Power Finance Corporation (PFC) chuan CSR aṭangin cheng nuai 546.90 a sanction a, MSSC chu implementing agency atan ruat a ni. October 11, 2023-a agreement ziah ni tawh chu nasa taka tihkhawtlai a ni. PFC lamin status report rawn dilin, New Delhi-a meeting turin MSSC leh Aizawl FC a ko hial. Aizawl FC complex phûl lem field siam hna hi ṭha taka thawh kan duh avangin Aizawl FC kuta awm thei se kan duh.