MPF-in inkhawmpui an hmang

Mizoram People Forum (MPF) chuan nimin khan Vanapa Hall-ah Annual General Meeting vawi 17-na an hmang a, MPF hnathawh thlirlêtna leh hma lam thlirna hun an hmang.

MPF Annual General Meeting-ah hian MPF-a tel kohhran leh pawl hrang hrang aiawh ṭhahnem tak an tel a; thupui, ''A chhe lai siamṭhat' tih chu sawihona a ni.

MPF inkhawmpui hun khatna chu MPF president Rev. Vanlalnghaka'n a kaihhruai a, General Secretary, Finance Secretary leh Treasurer ten report an pe a, vice president Lalhma-chhuana'n thu a sawi.

Hun hnihna chu vice president Rev. Zionavara Fanchun-in a kaihruai a, MPF president hlui Rev. Lalzuithanga'n 'A chhe lai siamṭhat' tih thupui a sawi. Rev. Lalzuithanga chuan, MPF hmalakna avangin Mizorama inthlan boruak leh candidate ruat chungchangah an ṭha thawkhat viaua a lang thu rualin, a lang lo lam chanchin erawh chu a la lungawithlak lutuk loh thu a sawi a ni.

Rev. Lalzuithanga chuan, sum leh pai hmanga vote zawn, vote lei leh hralh te, thil eng emaw intiam angte sawi a ni ṭhin chungchangah, politician-te leh candidate-te ai mahin mipui lamin an ti dik lo zawk nia sawi a nih ṭhin thu a sawi.

Candidate-te leh campaigner-te aṭanga therhlo beisei mipuiin an lo hmachhawn ṭhin chu siamṭhat ngai a nih thu sawiin Rev. Lalzuithanga chuan, "Siamṭhat a nih loh a, tun ang zela kan kal chuan kan ramah hian tun aia nasa zawk harsatna hrang hrang - dan pawisak lohna, hlemhletna, tualthahna, tharum thawhna leh rethei leh hausa karte zaute a hluar zel ang a, kohhran nun pawh a ṭha lo zawngin nasa takin a nghawng dawn a ni," a ti.