Sri City-a thawk turte fuihna hun hmang

Mizoram Youth Commission chairman Malsawmzuala Ralte chuan nimin khan MYC conference hall-ah Mizo ṭhalai, RK Enterprise, (Daikin AC Manufacturing), Sri City-a thawk tur mi 10-te thingpui inpuiin, fuihna hun a hmang.

Malsawmzuala Ralte chuan, Sri City-a hna thawka kal turte chu Pathian ṭihna, tumruhna leh taihmaknate nunpui tlat tur leh chhel taka awm turin a fuih a; an awm dan leh chet velna chu Mizo awm dan tih a nih zel dawn avangin Mizo hnam aiawh an ni tih hria a, theihtawpa nun uluk turin chah.

RK Enterprise (Daikin AC Manufacturing), Sri City hi Governor Dr Hari Babu Khambampati leh MYC Chairman-te'n a hmuna an enfiah tawh a ni a; MYC leh RK Enterprise ten thawhhona thuthlung an ziah angin Mizo ṭhalai 10-te hi thawk tura lak an ni. Mi 10-te hian November 11, 2024 khian an thawhna tur panin Aizawl an chhuahsan ang.