Inrenchem zawngin sorkar a kal - ZPM Ṭhalai

ZPM Ṭhalai chuan thuchhuah siamin, Mizoram sorkar chu inrenchem zawnga a kal zel thu leh inrenchemna avangin sorkar sum tam tak hum a nih thu an tarlang.

ZPM Ṭhalai chuan kum 30 chuang party sorkar pahnihin Mizoram an hruai tawh tih sawiin, "An theih tâwka ṭhain Mizoram min lo kaihruai tawh a, Mizorama hmasawnna an lo thlen tawhah lawmthu kan sawi a ni. Mahse, tuna kan ram dinhmun thlir chuan leiba ngah tak sorkar niin, pûk belh ngai renga min siamtute hi Zoram mipui hian kan hre chiang. ZPM-in sorkarna kan chang a, leibatna sal ata Zoram mipui khai chhuah tumin hma kan la mek a ni," an ti.

Mizoram Legislative Assembly pariatnaah MLA-te lirthei leina atan Rs 3,98,48,548 hman a nih thu sawiin ZPM ṭhalaite chuan, ZPM sorkarin inrenchemna a kalpui avangin MLA-te lirthei leisak ani lo a, sum tam tak hum a nih avangin lawmawm an tih thu an tarlang.

ZPM Ṭhalai chuan, MLA-te leh a kaihhnawih thil atana sum sên ṭhin tihtawp leh tihhniam avangin Mizoram sorkarin cheng tam tak a hum tih sawiin, "Kan sorkar hian Mizoram leibatna sal ata min khai chhuah a tum tak takah kan ngai. Financial management lamah kan chief minister leh finance minister ni bawk Pu Lalduhoma hi kan chhuang tak zet a ni," an ti.