Inthlanah sum leh pai hmanga tlin tumin hma kan la ve ngai lo - Thanzara

Mizoram Pradesh Congress Committee (MPCC) president chuan, Congress party-in inthlanah sum leh pai hmanga tlin tumin hma an la ve ngai lo niin a sawi a; SHC inthlan aṭangin an party-in nasa takin hma an sawn tih a lang niin a sawi bawk.

MPCC hian nimin khan Congress Bhavan-ah political session an hmang a; Lal Thanzara chuan, Sinlung Hills Council inthlan aṭangin Congress party an inlungrual tigh a lang nia sawiin, "Nasa takin hma kan sawn a ni tih a lang chiang. Pakhat chauh kan tling chungin SHC pumpuia vote tla zawng zawngah sorkar ta MNF vote 185 chiahin kan pha lo a, ZPM-te'n keini aiin vote 403-in an hmu tlem zawk hi hmasawnna a ni," a ti.

Lal Thanzara chuan, SHC inthlanah an chak theih mai dawna an ngaih thu a sawi rualinin, a tìr aṭangin hlauh an neih thu a sawi a, "A dáwn zan velah sum leh pai a leng ang a, chu chu kan do zo lo ang tih kan hlau. Sawi ang ngeiin sum leh pai mai ni loin khilai hmunah petrol pump an hawng ta emaw tih mai turin party dangte'n hma an la a ni," a ti a; an candidate-te erawh chuan sum leh pai hman tur an nei ve lo niin a sawi.

Kum 1980 khan AICC Treasurer-in inthlannaa hman tur sum Lal Thanhawla hnenah a pe a, an candidate-te hnenah an mamawh zat ṭheuhin a sem a, a bâng zawng chu a kìr leh vek nia sawiin Lal Thanzara chuan, "Hei hi Congress-in sum leh pai kan hman dan, kan kalphung a ni. Sum leh pai kan hmachhuan ve ngai lo... sum leh pai hmangin tlin tumin hma kan la ve ngai lo," a ti.

Inkhawmah hian SHC inthlanpuia Congress party candidate zinga tling awm chhun Lalrawngbawla, Khawlian bial hnenah lawmpuina hlan a ni a; MPCC general secretary R Vanlalvena'n SHC inthlan report a pe bawk.