AAI-in Mizoram sorkar hnenah Air conditioned bus pahnih an pe

Airport Authority of India (AAI) chuan Inrinni khan corporate social responsibility (CSR) hnuaiah air conditioned (AC) bus pahnih Mizoram sorkar an pe. Bus hi Thingdawl Nursing School-a hman tura ruahman a ni.

Bus hlan inkhawm hi Chief Minister bangla tualah buatsaih a ni a; CM Zoramthanga chuan, Mizoramin boruak thianghlim leh hrisel malsawmna a dawng tih sawiin, "A chhunga chengte pawhin hriselna ṭha tak kan neih theih nan ruahmanna hrang hrang siamin hmalak a ni a, hmalak zui zel a ni ang," a ti.

Chief Minister chuan, airport tichangtlung turin AAI nen Mizoram sorkarin thawhhona ṭha an neih zui zel a pawimawh thu sawiin, "Mizoram chu tlang ram a nih avangin inkalpawhna lama hmasawnna ruhrel hrang hrang ṭha neih a pawimawh," a ti a; kawng bakah, thlawhtheihna  hmanga inkalpawhna tihhmasawn a ṭul thu a sawi.

Health minister Dr R Lalthangliana pawhin thu sawiin, "AAI-te'n CSR hnuaia bus pahnih min pek hi Thingdawl Nursing School mamawh tak a ni. Covid-19 hri léng laka mipui an fihlim theih nana thawk ṭha ber state zingah Mizoram a lang a, Chief Minister-in mipui an him theih nan a tìr aṭanga ruahmanna siama chak taka hma a lak vang a ni," a ti.

Bus pahnih hi AAI DGM Aloke Gupta-a'n Chief Minister hnenah a hlân a, CM hian Health Minister hnenah a hlân chhâwng ve leh nghal a ni.