MZP-in HSLC 2015 top 10 an chawimawi Sikul tan hma chungchangah sorkarin thu a zûk dawn lo: Education Minister

Mizo Zirlai Pawl (MZP) chuan nimin khan kumin HSLC-a top 10-a lang Mizo zirlaite chawimawina hun Vanapa Hall-ah an hmang a; khuallian, School Education minister H Rohluna chuan, sorkarin sikul ṭan hma chungchangah thu a zûk dawn lo tih sawiin, sikul ṭan hma duh loa nuar mekte chu titawp tawh turin a ngen.

Minister H Rohluna chuan, "Tun dinhmunah sorkarin sikul ṭan hma tura thutlukna a siam tawh hi hnuh let a tum lo a, kaltlangpui a tum a ni," a ti a; sikul ṭan hma zirlaite mai bakah, Mizo ram leh hnam kal zel turah ṭha zawk tura mithiamte'n an ngaih a nih avangin sorkarin sikul ṭan hma a ti ta tih a sawi.

Sikul ṭan hma chu kalphung thar a nih avangin harsatna eng emaw chu a awm thei tih an hriat lâwk thu sawiin, H Rohluna chuan, "Thla hnih kan kal tawh a, hmasawna tam tak kan hmu. Kan ti zel ang a, a ṭhat dan kan hriat zel kan beisei," a ti.

Education Minister chuan, Lunglei lama sikul ṭan hun sawn hma duh loh vanga nuar mekte chu an nawrh titawp tawh turin a ngen a, "An duh loh an lantir hi Zoram mipuite'n kan hre tawh a ni," a ti.

School Education Minister chuan, sorkarin zirna siamṭhat tumin kawng hrang hrangin hma a la zel tih sawiin, "HSLC 2015 result-ah sorkar sikulte a tichhe ber kan ni a, mahse sorkar sikulte hi qualified teacher nei ṭha ber kan ni si. Hmasawnna tur tam tak kan nei a, hmasawn zel dan tur ngaihtuah chhuah a ngai," a ti a; zirtirtute chu ṭan la lehzual turin a chah.

Education Minister sawi danin, sorkarin middle school zirtirtu 102 lak a tum mek a, MPSC-in buaipui mekin, advertisement a chhuah tawh a, written exam buatsaih turin hma an la mek. Primary teacher pawh 60 lak belh leh an tum a, MPSC-in an buaipui mek a ni.

H Rohluna chuan, tun hnaia zirtirtu lak belhte chu a tam ber thingtlangah dah an nih thu leh, zirtirtu an lak belh leh turte pawh thingtlanga zirtirtu indaih lohna hmunah dah tum an nih thu a sawi. Thingtlangah zirtirtute tan quarters sak a nih theih nan DoNER-ah bawhzui mek a nih thu sawiin, "A bul ṭan nan quarters 50 sak theih beisei a ni," a ti.

Minister Rohluna chuan, kumin HLSC-a a tiṭha zual 10-ah Mizo vek an lang chu lawmawm a tih thu sawiin, "Hnungtawlh loa hmasawn zel turin duhsakna ka hlan a, taimak a ngai a, ṭan zual zel a ngai a, chhungkua pawh ṭan tlan a ngai a ni," a ti.

Zirlaite chu social media, mobile phone leh computer-te hmang nasa lutuk lo tura chahin, "Hengah hian hun kan khawhral nasa lutuk a, min tiṭhuanawp ang tih a hlauhawm. Insûm a ngai a, mahni inthunun a, chintâwk neih a ngai a ni," a ti a; zirlaite chu an hun kal zel turah duhsakna a hlan a ni.

HSLC 2015 top 10-te chawimawina hun hi MZP vice president Lalsangzuala Ngente-in a kaihruai a, MZP president Lalhmachuana'n zirlai tiṭhate chawimawi chhante a sawi a; khuallianin top 10-te hnenah lawmman a hlan.

Pakhatna hnenah Rs. 5,000, thuchei leh lawmman dangte pek a ni a; pahnihna aṭanga sawmnate hnenah Rs. 2,000 ṭheuh, thuchei leh lawmman dangte hlan a ni.

Lawmmanah hian Vanglaini tihchhuah ‘Mizoram Year Review 2014’, R Lalhmangaihsanga buatsaih ‘Mizoram General Knowledge leh Army Recruitment Guide’ leh Lalvangsanga Pautu buatsaih ‘Naupang thawnthu bu’ te pek tel a ni.