Tripura-ah Bru lak let dan tur sawiho

Mizoram sorkar aiawh leh Tripura sorkar aiawhte chu nimin khan Tripura-a Damcherra RD Block conference hall-ah an ṭhukhawm a; Tripura transit camp-a Mizoram Bru raltlan awm mekte Mizorama lak let dan tur an sawiho.

Meeting hi North Tripura additional district magistrate Ranjit Kar-a'n a kaihruai a; Tripura sorkar aiawhin Panisagar leh Kanchanpur-a Tripura official-te an tel a, Mizoram aṭangin Home department OSD David H Lalthangliana bakah, Mamit, Kolasib leh Lung­lei district-a officer-te an tel. Mizoram Bru Displaced People Forum (MBDPF) hruaitute leh relief camp tina hruaitute an tel bawk.

Meeting-a an rel dan­in, Bru raltlante Mizorama lâk let hna chu June 1, 2015-ah ṭan tura rua­hman a ni a, endik hna thawh phawt a ni ang. Endik hna hi ṭhuang hniha thawh tura ruahman niin, Mizoram Electoral Roll-a awmte endik a ni ang a, chumi hnuah Mizoram Electoral Roll-a awm lo, Mizoram mi nia inchhálte endik leh a ni ang.

Bru endik hna chu camp tinah a indawta tih tur a ni a, Kaskau camp-ah bul ṭan a ni ang. Bru lak let hna chu September 2015 chhunga zawh hman tura ruahman a ni.