KHAWTHLIR

Thisen pe
DIET, Mamita training mekte chuan May 14, 2015 khan Mamit District Hospital-ah thisen unit 11 an pe a, a petute mipa 10 leh hmeichhia pakhat an ni. Damlo retheite hman turin Hospital Poor Fund-ah Rs. 4,000 an pe bawk.

Core Committee
North Eastern Region-a 10% Lumpsum Grant hnuaia Lunglei khawpui chhung kawngpui thawm ṭhatna tur (Improvement of Internal Roads of Lunglei Town) bawhzuia DPR siam turin a Core Committee din a ni. Chairman-ah Lunglei DC leh member-secretary-ah Lungleia district urban development officer ruat a ni.

Chhiatna laka inven dan zirtir
Disaster Management & Rehabilitation department leh Central YMA ṭangkawpin chuan nimin khan Lunglei sub-headquarters YMA Hall-ah Lungleia YMA branch hrang hranga volunteer-te tan chhiatrupna laka inven dan zirna an buatsaih a; Dr Vanlalfela'n first aid chungchang a sawi a ni.

Indradhanush
Lawngtlai Chief Medical Officer office chuan, nimin khan CMO conference hall-ah Lawngtlai district-a community health officer, health supervisor leh health wor­k­er-te tan natna hri lakah invenna leh Mission In­dra­dhanush chungchang­ah zirna an buatsaih. Training-ah hian Lawng­tlai CMO Dr HC Thangkima bakah, Dr Vanlalrengpuia Chinzah leh Dr Zothanpari Chhakchhuak ten thupui an sawi.

Ph.D hmu thar
H Lalhmingsanga s/o Khualsavunga, Saron Veng, Aizawl chuan IIT-Guwahati-a Mechanical Engineering department aṭangin doctor of philosophy a hmu thar a, a thesis title chu, "Post combustion CO2 capture through adsorption process in a fixed and fluidized bed,' tih a ni. Ani hi Mizo mechanical engineer zinga Ph.D nei hmasa bera hriat a ni.