Subject Committee III-in ACH leh TCCC endik

Mizoram Legislative Assembly-a Subject Committee-III member-te chuan nimin khan Aizawl Civil Hospital (ACH) leh Tertiary Cancer Care Centre (TCCC), Zemabawka Health department hmalaknate a hmunah an endik.

Health department hmalakna endiktu Subject Committee-III member thawk chhuakte hi chairman Lalrobiaka, JH Roṭhuama, John Siamkunga, Dr K Beichhua leh Lalrinawma te an ni.

MLA rualte hi Hospital & Medical Education director Dr Lalbiakima leh joint director Dr Lalhmangaihi ten an ṭawiawm a; Aizawl Civil Hospital-ah chuan medical superintendant Dr Rosangluaia leh a thawhpuite'n an lo hruai kual a, Tertiary Cancer Care Centre-ah TCCC director Dr Lalsiampara leh a thawhpuite'n an lo dawngsawng thung.

Subject Committee-III hian ACH chhungah Central Sterile and Supply department, Computerised Hospital Management Information System, CT Scan khawl, Cardiology department tihchangtlun mek, State Medical Library leh Dental department tihchangtlun mekte an endik a; TCCC-ah hmanraw chi hrang hrangte an endik bawk.

Subject Committee-III hian nimina an thil hmuh dan leh Health department hotute nena an inbiaknate chu an la sawiho leh dawn a; rawtna an neihte chu sorkarah an thehlut dawn a ni.