CNCI-in Chakma chhiarpui duh lo

Chakma National Council of India (CNCI), Mizoram State Committee chuan thuchhuah siamin, Central YMA-in Mizorama Chakmate chhiarpui neih a tum chu Chakma mipuite’n an duh lo hle niin an tarlang.

CNCI chuan, YMA-in Chakma chhiarpui neih a tum chu chhan mumal awm loa Chakmate chhiar bik tumna leh, sorkar tih pawh ni loa chhiarpui buatsaih tum chu Chakma mite hmuhsitnaa an ngaih thu an sawi a, “Chakmate hi Mizoram mi dik tak kan nih avangin, Mizorama cheng ve dangte nen kawng engkimah thuhmuna en tur kan ni,” an ti.

CNCI chuan, sorkar ni lo pawl dangin Chakma chhiarpui an neih chuan thuneitute hnenah an lung­awi lohna an thlen ve dawn niin an sawi a; Central YMA thuchhuakah Mizoram sorkar chu ngaihdan fel tak siam turin an phût a ni.

Central YMA-in a duh dana Chakma chhiarpui a buatsaih chu a kal­tlangtir dawn leh dawn loh tichiang turin sorkar an phût a; dan lekkawh chu YMA mawhphurhna a nih leh nih loh tichiang turin sorkar an phût bawk.

CNCI press release-ah hian an general secretary Amar Smrity Chakma-in hming a ziak a ni.