Solar power plant hmasa ber hawn a ni

ZEDA-in Tlungvela megawatt 2 pe chhuak thei Grid Connected Solar Photovoltaic (SPV) Power Plant an bun chu December 4, 2020 khan Power & Electricity minister R Lalzirliana'n a hawng. He power plant hi Mizorama nizung chakna (solar energy) hmanga kawlphetha siamna (power plant) hmasa ber a ni.

R Lalzirliana chuan, sorkarin kawlphetha siam chhuah a ngaih pawimawh thu sawiin, "Nizung chakna hmanga kawlphetha siam chhuah pawimawhna hriain sorkarin Solar Power Policy a duang. Nizung hmanga kawlphetha siam chhuahna hmunpui Gujarat, Rajasthan, etc. leh Mizoram dinhmun tehkhinin  anni siam zat angte chu kan siam a beisei awm lo. Mizoramin lui khuah theih kan nei ṭha a, lui khuapa kawlphetha siam chhuah hi loh theih lohin kan ngaih pawimawh thar a ṭul," a ti.

P&E Minister chuan, India solar map-ah Tlung­vel khua a lang ta chu lawm­awm a tih thu sawiin, "Phal taka project atan ram petu Tlungvel khawtlang leh NGO-te chunga lawmthu ka sawi. Hripui léng leh inkhàrkhipna kara ZEDA hmalakna a fakawm hle. Vankalah pawh megawatt 20 pe chhuak thei solar power plant siam hna thawh mek a ni," a ti a; Saitual dáiah pawh megawatt 5 pe thei din tum a nih thu a sawi.

Power plant hawn in­khawm hi Power & Elec­tricity secretary Biak­tluanga'n a kaihruai a, bialtu MLA Lal­rinawma, deputy speaker pawhin thu a sawi. ZEDA direc­tor David Ramnunsanga'n technical report a pe.

SPV Power Plant, Tlungvel hi August 13, 2018-ah siam ṭan a ni a, November 5, 2020 khan enchhinna (trial run) neih a ni. A siamna atan cheng nuai 1400 ruahman a ni a, Mizoram sorkarin a tum vek a ni.