Horticulture hmalakna zawng zawng Bána Kaihah luhpui vek a ni dawn

Chief minister Lalduhoma hoin November 8, 2024 khan Secretariat conference hall-ah minister of state Prof. Lalnilawma enkawl department pathum - Horticulture, Rural Development leh PHE-te hnathawh thlir­hona, review meeting neih a ni. Horticulture hotute chuan an department hmalakna zawng zawng Bána Kaih (Handholding) Scheme hnuaiah thun luh vek a nih dawn thu an tarlang.

CM Lalduhoma chuan, department-te hnathawh ṭha lo emaw, an chak lohna hmuh chhuah tuma ṭhukhawm an nih loh thu sawiin, "Department-te hmalak dan hriatpui a, thawhhona ṭha zawk neih leh kan harsatna tawh mekte inhriatsakna atan te, hmasawnna chak zawk a awm theih nantea meeting ko kan ni," a ti a; harsatna an neihte sawi zel tura department official-te chahin, an hmalaknate a ṭha tlânga a hriat thu a sawi.

Prof. Lalnilawma pawhin thu sawiin, CM-in a sawi tawh ṭhin angin review committee neih ṭan a ni leh a hmasa ber atana a department enkawlte thlirho a ni chu a lawm thu a sawi a, "Meeting hian kan hmalak zelnaah rah ṭha tak a chhuah ngei ka beisei a, CM thuràwnte hi chak taka bawhzui zel a ni ang," a ti.

Review meeting-ah hian department pathumte hnathawh leh hmalaknate a mal malin thlirho a ni a; Horticulture department hmalakna zawng zawng chu Handholding scheme hnuaia thun luh (converge) vek a nih tur thu tarlan a ni.

Sorkarin thlai thar man a bithliah leh rate bithliah aia tlem loa lei ngei tura a thlan thlai pali zinga mi sawhthing, aieng leh hmarchate chu Horticulture department hnuaia mi a ni a; Handholding Scheme hnuaiah dah niin, thlai hralh leh lei dan tura department inbuatsaihna leh hmalak dante Horticulture department hotute'n an sawifiah.

Horticulture department hotute tarlan danin, kum khat kal ta chhung khan dragonfruit hralhna aṭangin cheng vbc 6.96, zikhlum aṭangin vbc 6.57, tomato aṭangin vbc 5.74, balhla aṭangin vbc 4.17, dawnfawh aṭangin vbc 3.49 leh lakhuihthei aṭangin vbc 2.52 vel an hmuh a ni a; heng thlai/thei chi ruk aṭanga loneitute thar chhuah chu cheng nuai 2,945 (vbc 29.45) vel a tling.

Rural Development department hnuaia programme lian tham thawh mekte dinhmun hrang hrang - sorkar kum kal meka ni 100 inhlawhna kalpui dan te, Project Rotling kalpui dan te, Social Audit Unit hmalak dan te, MzSRLM, SIRD-PR leh BADP hmalakna te, RD department dinhmun te, Vibrant Village Programme rawn kal tur te, RMIS leh an hnathawh dangte thlirho a ni.

Public Health Engineering department hmalakna tarlan danin, Jal Jeevan Mission hnuaiah water supply scheme (WSS) 852 kalpui zinga 657 chu gravity hmanga lak a ni a, 188 chu solar pump niin, grid power pump pasarih a awm. WSS 852 zinga 832 chu thawh zawh tawh a ni a, thawh mek 20 a la awm. NABARD fund aṭangin WSS kal mek 11 an nei bawk.

PHE hnuaia SASCI hmanga hmalakna te, NESIDS sum hmanga hnathawh mek te, Aizawl, Lunglei, Mamit leh khawpui danga tui lak hna thawh mek te, Ṭawi tlang tuihna lei hìpna (gravity) hmanga thawh mek te, Swatch Bharat Grameen hmalaknate tarlan a ni a; PHE department-in Cyclone Remal an tawrh nasat thu leh Aizawl tui lak pawhin ngai a la awh theih loh thu an sawi.

Ṭhutkhawmah hian adviser to CM TBC Lalvenchhunga, secretary to CM Vanlaldina Fanai, Prof. Lalnilawma enkawl department-a hotu te, Planning & Programme Implementation department hotu te, GAD leh CMO-a hotute an tel a ni.