Khuaino leh ramsa rêp an man

Environment, Forest & Climate Change (EFCC) department-a thawkte chuan November 9, Inrinni khan Lungleia bazar hrang hrangah khuaino leh ramsa zawrh an vai a, eng emaw zat an man.

EFCC department-a thawkte hian mi pahnih hnen aṭangin khuaino fûn 19 leh mi pahnih dang hnen aṭangin ramsa rêp fûn 18 an man. Khuaino leh ramsa rêp zuartute hi dan phal loh zuar tawh lo tura an intiamtir hnuah pawisa an chawitir a, an chhuah. An pawisa chawi tling khawm chu Rs 11,500 a ni.

Khuaino leh ramsa rêp an mante chu EFCC department mite chuan Inrinni vek khan an pisa bulah an hâl ral nghal a ni.

Lunglei Forest Division DFO Lalduhthlana chuan October 20, 2024 khan thupek chhuahin, ramhnuai aṭanga khuaino lâk, zawrh leh hralh khap a nih thu a puang.

Ramhnuai aṭanga lak khuai leh khawizu chu The Mizoram Forests Act, 1955 hnuaia forest produce zinga chhiar tel a nih thu tarlangin Lunglei DFO chuan, "Khuai lâk ṭhin dan enin a rêm mai ang tih a hlauhawm. Lo leh huan neitute thlai chin a lo puitlin a, hlâwk zawka thar a nih theih nan leh ramngaw a lo hrisel zawk theih nan Lunglei Forest Division huam chhungah ramhnuai aṭanga khuaino lak, zawrh leh hralh khap a ni," a ti.

Lunglei DFO chuan, ramhnuai aṭanga khuaino la leh zuar an awm ṭhin tih hriat a nih thu tarlangin, "Khuaite hi thlai chìn leh ramhnuai a thing leh ramhmul chi hrang hrang inthlahpunna atana nungcha pawimawh an ni. Chu bakah, thlai leh ramngaw ei chhetu nungcha dang eitu an ni," a ti a; khuai chu food chain-a pawimawh tak an nih thu a tarlang a ni.