Khuai zûk vangin tlangval a thi; Ṭiau luiah nu pakhat a tla hlum

November 9, Inrinni khan East Lungdarah khuai zûk vangin tlangval pakhat a thi a, Inrinni vêk khan Ṭiau luiah Thingsai khaw nu pakhat a tla hlum.

Vanglaini thu dawn danin, R Vanlalmalsawmzuala (30) s/o R Lalkhawzauva (L), East Lungdar chu November 8, Zirtawpni zana khuai lak an tumnaah thingkunga a láwn laiin khuaiin an zûk rawn a, East Lungdar damdawi-in panpui nghal a ni.

Damdawi-ina enkawl a nih hnuah amah a harh ṭhat avangin hawtir a ni a, zanah a buai leh avangin Aizawl lam pan tura tih a ni. Aizawl pana an kal laiin November 9, Inrinni zing dar 2:50 khan an khua aṭanga km. 10 vel hláah a hliam tuar loin a thi.

Mary Vanlalnunpuii (21) w/o Francis Lalramnghaka, Thingsai Pemveng chu Inrinni chawhma dar 11 vel khan Ṭiau luia chawhmeh zawnga an kalnaah luia a inchiah dai tur chu a chesual a, tuiah a tla a; nimin tlai thleng khan hmuh a la ni lo.

Mary Vanlalnunpuii hi Thingsai khawtlang leh Buang khua, Myanmar mite'n an zawng a, mi ṭhahnem tak an thawk chhuak. Mary hian a pasal bakah a fapa kum 2 mi a kalsan. A tlaknaah hian kum tin deuhthaw tlahlum an awm ṭhin niin Thingsai aṭanga thu dawnna chuan a sawi.

Bialtu MLA Jeje Lalpekhlua chuan Mary Vanlalnunpuii zawngtute hman tur tarpauline leh pawisa a pe a, Hnahthial DC office pawhin Thingsai khawtlang hruaitute hnenah ṭanpuina pawisa an hlan bawk.