Vawk damlo/thi hriattir lote lakah action lâk a ni dawn

Aizawl bawrhsap Lalhriatpuia chuan African Swine Fever-in ziaawm lam a la pan loh avangin BNSS 2023 tlawhchhanin vawk vulhtute leh vawk hmanga eizawngte tan thupek a tichhuak a; AH&Vety hnena vawk damlo leh thi hriattir lote lakah action lak a nih dawn thu a tarlang.

Aizawl Bawrhsap chuan, Mizoramah vawk pùl hri ASF léng a la ziaawm loh thu tarlangin, "He hri laka Aizawl district mipui kan him a, kan fimkhur zual zel nan leh hri léng zel tur vèn nan vawk chungchangah inkhuahkhirhna thupêk chhuah leh a ngai a. Vawk damlo leh thi an awmin AH&Vety department official-te hnenah hriattir vat tur a ni a, hriattir lo an awm a nih chuan action lak a ni ang," a ti.

AH&Vety department-in kumin January 1 aṭanga November 9, Inrinni thlenga an chhinchhiah chinah Aizawl district-ah vawk hri lenna khua/veng 102 a awm tawh a, chu'ngah chuan ASF vangin vawk 5,698 a thi tawh a, vawk 8,454 suat a ni tawh. Vawk thi leh suat belhkhawm chu 14,152 a ni.

Aizawl district-ah Mizoram pâwn aṭanga vawk, vawksa leh vawksa aṭanga siam lak luh khap tlat a nih thu tarlangin Bawrhsap chuan, "Vawk damlo talh leh hralh khap tlat a ni a, vawk damlo a awmin dah hran vat tur a ni. Vawk thi reng reng bawlhhlawh paihna hmunah leh lui kawr remchangah paih loh tur a ni a, ft. 4 tala thûkah phûm tur a ni," a ti a; vawk thi phûmnaah chinai kg. 2 vel tal phul tur a nih thu leh vawk in leh a vel tihthianghlim tur a nih thu a tarlang.

Bawrhsap Lalhriatpuia chuan, Aizawl district-a khua leh khua emaw, veng leh veng emawa vawk inlakpawh tawn turah vawk hrisel ṭha chauh lak tur a nih thu leh vawk hri lenna hmun (infected area)-a puante aṭangin vawk lak luh leh lâk chhuah khap a nih thu a tarlang bawk.